عفراء علوي محمدي- كود//

سلطات مدينة طنجة قررات تحيد ليباريير والحواجز الإسمنتية اللي كانت مطوقة بيهم مجموعة من الأحساء السكنية فطنجة من الشهر اللي فات، وهذشي بعدنما تحسنات الوضعية الوبائية فالمدينة.

عملية إزالة الحواجز بدات لبارح فالليل واستمرات حتى لليوم الخميس فالصباح، بزاف ديال الطراكسات كانو خدامين باش يحيدو هذ الحجر من مداخل هذ الأحياء، باش ترجع الحياة لطبيعتها فيها.

لكن فالمقابل السلطات خلات ليباريير فمجموعة من الاحياء الاخرى اللي مازال كتسجل بؤر وبائية، بحال حي قنطرة بن ديبان والموظفين ودار التونسي.

وفالوقت اللي مدينة طنجة كانت كتسجل بعد رفع الحجر الصحي مئات الإصابات يوميا وعشرات الوفيات أسبوعيا بفيروس كورونا، دابا هذ المعدلان نخافضو بشكل كبير فعاصمة البوغاز، والحالة الوبائية ديالها صبحات مستقرة.