سهام البارودي – كود ///

النقاشات كثيرة فوسائل التواصل الاجتماعي حول داك الاستاذ الفرنسي لي تذبح بوحشية ! و المصيبة الكبرى انه بزاف د الاصوات لي محسوبة على المسلمين المعتدلين زعما كايقولو بلي ” ايه ماكانش عليه يذبحو”و كايزيدو واحد الجملة قاتلة “ولكن تاهوا ماكانش عليه يعرض رسومات على الرسول”

انا شخصيا كانشوف اي واحد كايبرر عمل ارهابي بشكل مباشر او غير مباشر هوا براسو راه ارهابي غي ماتاحتش ليه الفرصة باش يهز السيف و يدوز يشلض فبنادم !

تا كيفاش ولكن ؟ كيفاش ولكن ؟! راه ماكاين بو ولكن ! الاستاذ الفرنسي عندو الحق يعرض الرسومات ديال الرسول على التلاميذ ، و يعرض رسومات ديال البابا و ديال النبي عيسى و موسى و يعرض اي عمل ابداعي يفتح من خلالو النقاش حول الحرية باش يقري التلاميذ ديالو معنى الحرية و داك الاستاذ راه اليوم شهيد الحرية !الحرية لي هاد الارهابيين لي معششين فوسائل التواصل الاجتماعي و حتى فالواقع ماكايعرفوهاش و ماعمرهم يعرفوها ! و حتى لنفرض اذا اختلفتي مع الاستاذ فقضية عرض الرسومات راه مايمكنش تقول ديك “ولكن …”

اي واحد كايقول ديك “ولكن ماكانش عليه يعرض الرسومات”

و اي واحد كايقول ” ايه ولكن كان عليه يحتارم الدين ديالنا”

و اي واحد كايقول ” ايه ولكن تاهوا غلط ملي عرض رسومات”

“ايه ولكن ماكانش عليه…”

كاين لي فات هاد النيفو و مشا كايجبد قاليك الماضي الاستعماري ديال فرانسا و قاليك ” وا لكن حتى فرانسا كانت كاتقتل المسلمين …” آ سير الله ينعل المكلخ لي حطك !

اي واحد كايستعمل ديك “ولكن” باش يبرر العمل الارهابي فهو ارهابي ماكاين ما ولكن ! حتى حاجة ماكاتبرر انك تشد موس و تذبح انسان آخر! حتى حاجة ! ايه آ سيدي واخا يرسم الرسول ماتذبحوش ! واخا يرسم الله ماتذبحوش ! وراه قمة الحماق و الجهل و الوحشية و الانحطاط انك تقتل انسان حيت رسم شي حاجة ماكاتناسبكش و ماعجباتكش !

ماكاينش لي موسخ سمعة الاسلام فالعالم قد هاد الارهابيين المتخفيين ! لي ماكايدينوش الارهاب بشكل مباشر بل بالعكس كايعطيوه تبريرات من تحت الدف و كايساهمو فانتشار الفكر الداعشي ! و ماشي غي كايساهمو فانتشار الفكر الداعشي بل كايعطلو الخدمة لي خاصها تدار على هاد الدين !

الاسلام اليوم محتاج لناس عقلاء و مفكرين د بصح يهيؤوه و يصلحوه و يفتحو النقاشات فيه كدين باش يساير العصر و يرفعو عليه ديك الصورة المتداولة ديال الدين الذي لا يسمح بالمساواة للمرأة و لي لا يسمح بحرية المعتقد و كايوقف قدام مجموعة من الحريات !

بابا الكنيسة الكاثوليكية هادي يوماين خرج باش يقول بلي من حق المثليين انهم يأسسوا اسرة في خطوة جريئة غاتدفع بالكنيسة الكاثوليكية نحو المزيد من الحرية ! و غاتحسن الصورة ديالها و غاتعطيها اشعاع اكبر كمؤسسة دينية ! و الاسلام ؟ الاسلام ديالنا آ سيادنا مازال واقفين عليه بزاف ديال الظلاميين و الاقصائيين و المتطرفين اعداء الحب و الجمال و الفن ! رافضين يديرو اعادة قراءات و تنقيح للنصوص و الثرات باش يسايرو العصر و التقدم الانساني ! و لي دوا ؟ لي دوا يرعف و لا يزحف و لا يتذبح !