سهام البارودي – كود//

اليوتوب وسيلة لكسب المال هادي كلشي عارفها و بزاف ديال اليوتوبورزات فالمغرب كايفرگعو ليڤي و كايدخلو الملايين من ادسنس كل شهر و طبعا المحتوى راه كايشبه للشعب لي كايستهلكو ! الشعب فيه شوية ديال المثقفين و الناس الواعية و بزاف ديال بنادم مسالي قبو و باغي غي يبرگگ و يتسلى ! كذلك و مثال اليوتوب ! شوية ديال المحتوى العلمي و الثقافي و بزاف ديال المحتوى ديال التبرگيگ و الضحك و التسلية ووصفات تبييض المناطق الحساسة ! الشعب فيه قلة من العيالات لي كايقلبو يكونو رشيقات و الاغلبية بغاو يربيو الترمة يعني من العادي فاليوتوب انك تلقا اغلبية الوصفات هي وصفات الغلض و خلطي نوراڤيت مع الحلبة و ديري التحاميل الصحراوية للترمة … ايوا شنو ؟ راه المغرب هذا و المغرب ماشي هوا السويد !

وحيت اليوتوب ماكايطلبش منك شي مستوى علمي باش دير قناة و ماكايقوليكش عطيني شهادة طبية كاتثبت انك خالي من الامراض النفسية فمن العادي جدا انه اغلب الناس لي نشوفو فاليوتوب يكونو حماق ! مسطيين ! و مراض عقليا و نفسيا  … المشكلة انه عام على عام النيڤو ديال الحماق فاليوتوب كايطلع و حيت بنادم ماقاريش و مريض و ماواعيش فراه ماعندوش الحصارات يقدر يدير اي حاجة فسبيل الادسنس !

و هاد اي حاجة شفتها هاد اليوماين وانا كانتفرج فيوتوب فاش لقيت أم كاتجوج ولدها شي عندو تمنطاشرعام يعني مازال مراهق لمرا اكبر منو عندها واحد و ثلاتين عام و مريضة نفسيا علاش ؟ باش تطلع القناة ديالها و يتبعوها الناس ! الزواج طبعا مادامش اكثر من تمنياوربعين ساعة و تفرتك!

بنادم كايصحابو راه نزق ! كايتفلى على عباد الله و يستغل المرض النفسي باش يصور الفلوس و مافراسوش بلي راه بالمقابل كايرهن مستقبلو و مستقبل ولادو فحال هاد الام لي جوجات ولدها لهيام سطار باش طلع القناة ديالها من بعد گاع محاولاتها الفاشلة يصحابها راها نزقة ! و عاد كاتدوي على ولدها على اساس انه بغا يولي انسبيكتور ! وا لالة ! ولدك نهار تاجرتي بيه فالسوشل ميديا و حطيتيه فهاد الموقف البهلواني ديال الزواج مع مرا اكبر منو و مريضة نفسيا باش طلعي قناتك راه رهنتي ليه حياتو دابا و مستقبلو ! اشمن انسبيكتور ؟ عمرك شفتي شي انسبيكتور مشوه فاليوتوب ؟! عمرك شفتي شي انسبيكتور كاتاجر بيه مو فاليوتوب و هوا مراهق ؟

ولكن معامن تهضر؟

اغلب اليوتوبوزات ماسوقهم لافمستقبل د الاولاد لا فقيم لا فمبادئ لا فنفسية … بغاو غا الفلوس واخا يصورو تراميهم عريانة و هانية !