كود- وكالات//

ريسطو تفركَع، اليوم فالصباح فأبو ظبي فالإمارات، تصابو بسبابو العشرات، وخلق واحد الحالة من الرعب.

شهود عيات أكدو أن آثار الدماء تجاوزات المطعم اللي تفركَع بكثر من 10 متر، وهي الآثار اللي ظهرات ففيديوهات وتصاور تناقلوها نشطاء ديال الحادث.

وقالت وكالات الأنباء الإماراتية أن البوليس ورجال المطافئ والإسعاف تدخلو فالوقت المناسب، باش يشرفو على إخماد الحريق اللي تسبب فيه الانفجار، ويسعفو المصابين.

وقالت الوكالة أنه لحد الساعة كاينين إصابات بسيطة ومتوسطة، وكلشي داوه يتلقى العلاج فالسبيطارات.

وبزاف ديال المباني المجاورة تقاصت بالانفجار، كيف تقاصو حتى الطوموبيلات اللي كانو مستاسيونين تماك.

والأبحاث الأولى أكدات بأن هذ الانفجار ناتج عن تسربات فتيويات الكَاز، اللي وقع فيهم مسكل بسبب ارتفاع درجة الحرارة اللي كتعرفها البلاد هذ الأيام.

هاد الانفجار برزط كلشي حقاش جا فالنهار اللي دارت فيه اول رحلة بين تل ابيب وابو ظبي. الرحلة التجارية انطلقت من مطار بن غوريون وغادية دوز على السعودية ورأسها نسيب ترامب ومستشارو القوي جاريك كوشنير ومسؤول الامن القوي الاسرائيلي.

#شرطة_أبوظبي تتعامل حاليًا مع انفجار ناتج عن تمديدات غاز في مطعم ببناية بشارع راشد بن سعيد بـ #أبوظبي أدى إلى إصابات بين البسيطة والمتوسطة وتم نقلها إلى المستشفى لتلقي العلاج#وام pic.twitter.com/pc50YulWZZ

— وكالة أنباء الإمارات (@wamnews) August 31, 2020