سامي العلوي -گود كازا //

قالت مصادر “گود” أن الوكيل العام للملك بمحكمة الاستئناف بسطات، حرك نهار لاربعا واحد الملف هادي شحال من عام وهو راگد في الاقليم وكلف المركز القضائي ديال جوندارم سطات باش يبحثو مزيان في هاد البيعة وشرية ديال استغلال منجم واش كيتطبق دفتر التحملات ولا.

وحسب نفس المصادر فراه فرقة خاصة من عناصر المركز القضائي ديال الجوندارم في سرية سطات، بدا لاربعا المسطرة ديال البحث مباشرة مني حرك الوكيل العام للملك بمحكمة الاستئناف الملف ديال خروقات المناجم بمنطقة اولاد سعيد من بعد سنوات ديال السكات لي نهجوها مسؤولين ومداروش لي كان خصو يتدار باش يوقفو معاناة السكان ويوقفو التجاوزات لي كانت كتدار قدام السلطات.

الجوندارم مشا نهار الأربعاء في العشية لدوار العونات العدول فجماعة كدانة باش تكمل خدمتها ودارت معاينة ميدانية وسمعات لمسؤول وصورات الكاميوات ودارت الإجراءات القانونية ديالها.

مصادر من عين المكان قالت ان الضابطة القضائية سجلات خروقات كثيرة، منها ان المنجم معندوش وثائق ديالو في نفس البلاصة، ومكينش احترام لدفتر التحملات ومكينش تحديد مساحة ديال المقلع ومكينس سياجات يمنعو ولوج الناس والحيونات عاد زيد دايرين حفر كبيرة.

وفي هذا الصدد كانت لجنة اقليمية زارت هذا المنجم ووقفت على مجموعة من التجاوزات او رسلات الجهات المختصة باش دخل او توقف هذا العبث ديال غياب المراقبة الفعلية والبعدية ديال الساهرين على هذا القطاع .