كود سبور//

قرر الوداد الرياضي يفتح المفاوضات من جديد مع فريق اتحاد طنجة، باش يحصل على الخدمات ديال الغابوني أكسيل مايي فالانتقالات الصيفية الجارية، من بعدما فشل الانتقال ديال اللاعب للهلال السوداني.

وحسب مصادر مطلعة فالإدارة ديال الوداد الرياضي رجعت كتفاوض مع اتحاد طنجة، والفريق الأحمر عندو رغبة كبيرة للحصول على الخدمات ديال أكسيل مايي وقدم عرض كتبلغ القيمة ديالو أكثر من 300 مليون، وباغي يحسم الصفقة.

وكانت منافسة فأول الأمر ما بين الوداد الرياضي والغريم ديالو الرجاء الرياضي، قبل ما يدخل الهلال السوداني على الخط ولي كان قريب من حسم الصفقة بأكثر من مليون دولار، لولا تردد اللاعب الغابوني فالانتقال للسودان بسبب “مخاوف أمنية” الأمر لي جعل الصفقة تفشل حسب ما ذكر الهلال السوداني.

وكيسعى الوداد الرياضي برئاسة سعيد الناصيري باش يتعاقد مع مهاجم قناص فحال أكسيل مايي، باش يسد الفراغ لي كاين فالهجوم ديال الفريق الأحمر من بعد الرحيل ديال الكونغولي غاي مبينزا.