نجوى المالحي- كود//

الكلاخ فيه وفيه، ولكن يوصل لدرجة أنه ينشر معلومات خاطئة وخطيرة بين الناس خصوصا في هاد الظروف الصعبة لي كتعيشها البلاد بسبب انتشار فيروس كورونا، فالفعل كيستحق متابعة قضائية لأي واحد تسول له نفسه أنه يضرب في الزيرو المجهودات لي كدير الدولة ومعاها المواطنين لاحتواء الوباء.

مناسبة هاد الهضرة واحد “المؤثرة” عندها صالون التجميل، دارت ستوريات على حسابها في انستگرام كتقول فيهم أن الناس لي كيموتو في المستشفيات في المغرب سببهم الإهمال ماشي كورونا.

واش هاد السيدة طبيبة؟ واش كتعرف اش كتقول، وكانت فوعيها الكامل وهي كتسجل الستوريات؟

بالتأكيد هاد السيدة ماواعياش وماعارفاش الخطورة ديال الهضرة، حيت هادشي لي قالت لا يمكن يقولو إلا واحد مجنون خاصو سبيطار، ولا ضاسر متخلف خاصو الحبس.