عفراء علوي محمدي- كود//

كل رمضان بحال العادة كيخرجو المكابيت يرتكمو فالجرائم دالعنف ضد النساء، حيت “كيستفزوهم بلباسهم وهوما صايمين”.

صفحة “نو. حشومة” فتطبيق أنستكَرام كشفات على وقائع بحال هذي، وعلنات انها غادي تبث شهادات ديال نساء كيعانيو بسبب الذكوريين اللي كيتاخدو رمضان سبة باش يفجرو حقدهم على النساء، ويعنفوهم ويعايروهم.

وفشهادتها للصفحة، قالت إحدى الضحايا، اللي تعرضو ليها شي كلوشارا فكازا قريب لشارع بن تشفين، أنها خرجات مع 6:30 دالعشية باش تتسخر، هي وصاحبتها، ولابسين لباس عادي غير مستفز نهائيا، وماحاطينش الماكياج ولا مقادين، وجا واحد كيجري من بعيد ولاح عليهم شي ليمونة خامجة.

وزادت انهم تصدمو، وماعرفوش بشمن حق هذا دار فيهم هكذا، قبل ما يجي واحد اخر فنفس الوقت، واللي ديما كيوقف عليها وماكتجاوبوش، جا يلوح عليها وتاهوا شي حاجة وغوت عليها من لفوق.

https://www.instagram.com/p/CN3F7DUlr7c/?utm_source=ig_web_copy_link