كود احمد الطيب ///

المغرب غادي يكون من السباقين فالعالم باش يدير الڤاكسان ضد “كورونا ڤيروس”. من نهار لقاء شرف عليه رئيس الدولة الملك محمد السادس واللي تبع قرارات اللجنة العلمية بدات لخبارات على هاد اللقاح.

هادا لقاح مهم بزاف. كاينة هدرة على انو فاللول غادي يكون شي 5 مليون مغربي مستافد. هاد اللقاح فيه جوج. تجارب دارت كلها كانت مزيانة حسب السلطات الصينية. اللولين اللي غاديين يستافدو هما الناس اللي فالصفوف الامامية فالصحة والامن بكاع انواعو…. والناس اللي كبار فالسن.

الملف شداتو وزارة الداخلية باشراف من القصر. اي ان رئيس الدولة باغي المشروع ينجح. متبع كل التفاصيل.

دابا اللقاح يقدر يكون فالمغرب شهر دجنبر. هنا العملية فيها جانب كبير للتواصل. خاص لمغاربة يعرفو كلشي. اش قالت المجلات العلمية المتخصصة على الڤاكسان ومنظمة الصحة العالمية وكيفاش غادي يدار …. وقتاش وفين وووو

كاينة عملية تواصلية كبيرة. هادي عملية كتهم الوطن وخاص الخدمة تكون فيها فابور. “كود” غادية تدير كاع اشكال التواصل اللي فيها طبيعة بيداغوجية كاشهار وفابور. غادية تتبع هاد العملية من الفها حتى ياءها فيما يتعلق بالاشهار وفابور.

طبعا الجانب الاخباري هادي قصة اخرى. كاين عمل مهني كيديروه الصحافيين. حنا كنهدرو على فيديوات غاديين يدارو ووصلات اشهارية غادية تصايب على هاد العملية. هادي “كود” اللي غادية ديرها بدون مقابل

مشروع بحال هادا راه مشروع غير مسبوق. وهاد الشي اللي غادية ديرو “كود” مساهمة بسيطة فهاد العملية. اللي مزيان فيها ان وزارة الصحة بعيدة عليها فالجانب المتعلق بالتواصل.