الرئيسية > آراء > المغرب حاليا كيعيش إستعمار حقيقي من طرف الكارديانا لي شادين كاع الشوارع والزناقي والشواطئ ديالو مستعمرة من صحاب الباراسولات والطبالي والكراسة وطروطوار مستعمرينو طراسات القهاوي
29/07/2022 15:00 آراء

المغرب حاليا كيعيش إستعمار حقيقي من طرف الكارديانا لي شادين كاع الشوارع والزناقي والشواطئ ديالو مستعمرة من صحاب الباراسولات والطبالي والكراسة وطروطوار مستعمرينو طراسات القهاوي

المغرب حاليا كيعيش إستعمار حقيقي من طرف الكارديانا لي شادين كاع الشوارع والزناقي والشواطئ ديالو مستعمرة من صحاب الباراسولات والطبالي والكراسة وطروطوار مستعمرينو طراسات القهاوي

محمد سقراط-كود///

كنظن أن الإستعمار الفرنسي والإسباني للمغرب وماقدرش يفرض السيطرة ديالو الكاملة على جميع مساحة البلاد بحال لي قدرو يفرضوها العساسة ديال الطوموبيلات وصحاب الباراسولات والسماسرية والقهاوي لي مخرجين الطيراسات فوق ممر الراجلين، إستعمار دوي القربى أشذ مضاضة واحد ولد بلادك كتلقاه مستعمر شارع عام صحة وكيفرض عليك تخلصو أو يشبعك سبان ويقدر يقيص ليك الطوموبيل أو الموطور لي حتى هو واخا في الأصل هو وسيلة اقتصادية للتوفير ولكن في المغرب غير تحطو فشي قنت يبعث معاك واحد باغي يتخلص من عندك أو يعيط ليهم يشفروه ليك، مغاربة قلال لي متعرضوش للإبتزاز في إحدى عطلهم الصيفية أو حتى في باب دارهم وقدام خدمتهم من طرف كارديان، حتى كيبعث معاك وملي كتغاوت معاه كتسمع تعاون معاه راه دريويش وماشفتوا غير هذا ولد الشعب بغيتو تحكروا عليه، هادشي ديروه مع المسؤولين والشفقارة الكبار.

على أساس أن مول الطوموبيل جاي من المريخ وغير بمجرد يشري خرشاشة بتلاتة دالمليون صافي مابقاش ولد الشعب ومابقى خاصو خير، وأي سلوك منو فيه ريحة الرفض دالإبتزاز من طرف الكارديانة هو تعجرف وتعالي على بسطاء المغرب وولاد الشعب، وهوما كتلقى غير البرهوش لي كيتسخر ليهم عندو إس آش أرخصها بتلاتة دالمليون، ديما كتسمع أن الحدود البحرية للمغرب كبيرة ويصعب حراستها كاملة وخاص ميزانمية كبيرة لذلك وفاش كتجي الصيف كتلقى صحاب الباراسولات مستفينها طبالي وكراسة من السعيدية حتى لأكادير كلها باراسول لاصق في خوه، هو الصراحة حاجة زوينة تمشي للبحر وتلقى واحد عندو تجهيزات للكراء بلا ماتجيبهم نتا أو تنساهم أو تبغي تمشي على غفلة، ولكن لي مقودة هو تمشي للبحر وتلقاه جا قبل منك مع النبوري وستف الكوسطا كلها مضولة وكراسا وطبالي وفاش يجيو الناس مايلقاو فين يكلسو، حتى لي عندو كراساه وطباليه راه مكيلقى فين يحطهم وكيظطر يكلس اللور بعيد على البحر خصوصا لي عندو الدراري الصغار كيحتاج يحضيهم ويكونوا قبالتو.

المغرب حاليا كيعيش إستعمار حقيقي من طرف الكارديانا لي شادين كاع الشوارع والزناقي والشواطئ ديالو مستعمرة من صحاب الباراسولات والطبالي والكراسة وطروطوار مستعمرينو طراسات القهاوي ، عاد زيد مشاكل خرى ديال السمسارة والغلاء الموسمي وقرعة دلما هي اللخرة في حانوت كيبعيها العام كامل بخمسة دراهم كتجي الصيف كيدير ليها ستة، بلا منهدرو على صحاب الماكلة وداك بوقنينط ديال آجي كول عندنا وبنادم كيجرك، وطبعا الداخلية عين المغرب التي لا تنام يبدو أنها ناعسة وشابعة نعاس على ما يحصل في شواطئ المغرب وشوارعه من إستغلال للفضاء العام بأبشع الطرق من طرف قطاع العصر الحديث، معندها حتى معنى تلقى شاطئ أو بحيرة أو غابة وواحد حاط كرياج باش تدخل ليهم وحابس الطريق حتى تخلص عاد تدخل، أو كاين لي مقاد التيكيت وكاتب فيه الجماعة والثمن الى كان هادشي كيمشي للجماعة والدولة بغينا نعرفو شحال وكيفاش والى كان غير سيبة بغينا نعرفوا المخزن شنو كيدير حتى ماينقيش البلاد من هاد الفطريات.

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه

29/03/2024 00:00

نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري