كود- عن لاليبر//

علنات المغربية البلجيكية، إحسان حواش، المفوضة الحكومية لمعهد المساواة بين المرأة والرجل فبلجيكا، استقالتها لبارح الجمعة من هذ المنصب، من بعد ما “تعرضات لهجمات شخصية ومطاردات إلكترونية”، حسب ما قالت.

وكان الحجاب اللي حواش دايراه داير ليها المشاكل داخل المعهد، من بعد ما اعتبر كورونتين دوسال، الإداري بالمعهد، على أن هذا “فعل مستفز”، وماشي محايد، باش تجاوبو هي بأنه ماعندوش الحق يتدخل ليها فلباسها، ومن المرجح يكون هذشي اللي دفعها تقدم استقالتها.

وقالت حواش، فرسالة لوزيرة الدولة لتكافؤ الفرص بين الجنسين فبلجيكا، سارة شليتز، انها مللي تعينات، تعرضات لاعتداءات شخصية عنيفة، وزادت: “النقاش حول الحياد مشروع، لكن ماخاصش يكون بناء على بحال هذ الأعمال، هذ انعدام الثقة والعنف تجاهي ماغيخلينيش نمارس وظيفتي بكفاءة، ويتخلق نقاش جدي فهذ السياق”.

وقالت أن عملها بدا يضعاف داخل المعهد، بسباب هذ الهجمات المستمرة عليها، واخا كانت متعلقة ومآمنة بالدور اللي كيلعبو المعهد.

وتابعات: “من اللي بدا هذشي عليا، قررت نقدم استقالتي باش نحمي راسي من التنمر الإلكترونب اللي كنتعرض ليه، وباش نحافظ على الناس العزاز عليا وعلاقتي بالمؤسسة والمعركة اللي مآمنة بيها”.

وأكدات أن استقالتها ماكتعنيش نهاية التزامها بالمساواة والحقوق الأساسية اللي غتستمر فالدفاع عليها باشكال أخرى.

وتفاعلات سارة شليتز مع استقالة حواش بالقول انها “كتأسف لهذ القرار”، بحيث حواش فنظرها كتتوفر على المواصفات الكاملة لتقلد هذ المنصب.

وصرحات انها كتحترم اختيارها على كل حال، وكتمنى ليها مسيرة موفقة.

من جهة اخرى، كانت كشفات تقارير إعلامية أن إحسان حواش عندها صلة بجماعة الإخوان المسلمين، وان هذي هي المعلومات المتداولة فأجهزة المخابرات، وغيتم إخبار الحكومة بيها، وهذشي اللي خلا البعض يدعم الاستقالة.

حواش فردها على هذشي نفات علاقتها بهذ المنظمة.