عفراء علوي محمدي- كود//

المرشحين لاجتياز مبارات الأمن الوطني لسنة 2020 مطالبين باش يسيفطو ملفات الترشيح ديالهم فالبوسطة قبل غدا السبت 28 نونبر، لكن مجموعة منهم تعطلو فالدفيع وحصلو بسبب الإضراب اللي دايرينو موظفي بريد المغرب لبارح واليوم.

وعاينات “كود” أت بعض وكالات البريد ف”كازا” ماقبلاتش دوسيات بعض المرشحين من 25 نونبر، على اعتبار أنه كاين احتمال كبير مايوصلوش بسبب الإضراب، سيما وأن أغلب الوكالات كانت سادة البارح واليوم.

مجموعة من المرشحين دارو طلبات وتدوينات ورسائل بارطجاوها على مواقع التواصل الاجتماعي وتطبيق واتساب، كيطالبو فيها المدير العام للأمن الوطني، عبد اللطيف الحموشي، باش يتدخل لتمديد الأجل القانوني، خصوصا وأن الطلبات ماكتقبلش إلا عبر البوسطة.

وواحد من المرشحين قال فرسالة مفتوحة أن “عنصر الاستعجال قائم… وبزاف ديال المرشحين للمباراة كيستفسرو على كيفية إيداع ملفاتهم مع العلم أه لا تقبل الملفات المتوصل بها بعد هذا التاريخ”.