الرئيسية > آراء > المخزن فخدمة وهبي. بعد ما شكك فنزاهة الانتخابات وحلف ما يكون وزير. فضيحة اخرى: المجلس الوطني للبام عينو وزير فحكومة مازال ما عينهاش مول لمظل
18/09/2021 09:00 آراء

المخزن فخدمة وهبي. بعد ما شكك فنزاهة الانتخابات وحلف ما يكون وزير. فضيحة اخرى: المجلس الوطني للبام عينو وزير فحكومة مازال ما عينهاش مول لمظل

المخزن فخدمة وهبي. بعد ما شكك فنزاهة الانتخابات وحلف ما يكون وزير. فضيحة اخرى: المجلس الوطني للبام عينو وزير فحكومة مازال ما عينهاش مول لمظل

كود هناء ابو علي الرباط ////

حزب الاصالة والمعاصرة ماشي الخصوم السياسيين ولمغاربة اللي كيشوفوه حزب فشي شكل. “وافد جديد” تفرض بالقوة. حزب ولد زروال. اللا شوفو هو كيفاش كيتصرف.

فبيان المجلس الوطني للحزب البارح٬ بلا ما نهدرو على انو ما عمرو انعاقد وباللي حتى المكتب السياسي مازال ما اكتاملش…. نقراو غير “سابعا” اللي فيه. هاد 7 فيها “تفويض للسيد الأمين العام تدبير باقي مسلسل المشاورات حول تشكيل الحكومة المقبلة، ودعوته لتمثيل الحزب داخلها، عبر المشاركة الشخصية في تركيبتها المقبلة”. باش تعرفوه حزب فشي شكل وفوق كلشي٬ قبل كانو خرجو البرلمانيين ديال الحزب وقالو صافي يا وهبي يا اميننا العام لقد فوضناك باش تبدا اجراءات تشكيل الحكومة. اواه. وانتوما شكون فوضكم. اللي فراسنا انتوما يا برلمانيي البام ما عندكمش مؤسسة او جمعية منضويين تحتها. ثم واش كلكم ولا غير بعضكم.

لكن البارح فالبيان كانت قوادة كثر. وهبي اللي كان كيحلف ما ولى وزير فحكومة يرأسها زعيم شي حزب وخاصة ايلى كان عزيز اخنوش ديال التجمع الوطني للاحرار٬ اليوم دخل لهاد الحكومة قبل حتى ما يعينها الملك محمد السادس. اه دابا عاد فهمنا صورتو مع اخنوش والمنصوري باش كان مجبد يديه وداير رجل على رجل بحال شي باطرون مستقبل الخدامة عندو. طريقة بركتو بغى يقول للمغاربة راني وزير صافي.

اخنوش راه مازال رئيس حكومة مكلف بتشكيلها. يعني هو رئيس الحكومة مازال ما شكلش الحكومة اللي غادي يعينها الملك. كيفاش هاد وهبي دخل ليها. الفقرة كتقول “دعوته لتمثيل الحزب داخلها غير المشاركة الشخصية في تركيبتها المقبلة”.

الصحافي علي انوزلا مدير نشر “لكم” فتدوينة علي صفحتو فالفايس٬ دار وصف زوين لوهبي وللحزب سماها “خفّة الرٍّجل.. والرّجٌل”. رجلو خفيفة وهو خفيف. واعتبر هاد البيان من مجلس ما عمرو انعاقد “خِفّة في العمل السياسي، على الأقل حسب ما تقتضيه التقاليد المرعية التي لا أعتقد أن الحزب، الذي خرج من دار المخزن، يجادل فيها”.

حزب خرج من المخزن يضيف انوزلا “قرر فجأة وفي اجتماع استثنائي وبأمر من رئيس الحزب الاجتماع وفرض تعيين نفس الرئيس في حكومة غير معينة أصلا، ورئيسها مازال مجرد رئيس مكلف ومهمته هي اقتراح الوزراء على الملك، وبعد موافقته يتم تعيين الحكومة وأعضائها. على الأقل هذا ما ينص عليه النص الدستوري”.

ووصف انوزلا هاد السلوك كما يلي: “حقّا، الانتهازية والوصولية لا تُعمِي الأبصارَ فقط ولكنها تُعمِي الضمائر إن بقي شيء منها في الصدور الخَاوِيَةٍ۬”

نقطة اخرى فهاداك المجلس للي دار البارح هو كلمة وهبي نيت. هادا اللي قال ان لفلوس كانت دايرة فالانتخابات واتهم التجمع الوطني للاحرار بتوزيعها٬ شفناه البارح كيشكر ويجبد الملك عشرات المرات فخطابو وكيهدر عكس ما كان يصرح به على لفلوس ودخول صحاب لفلوس للحياة السياسية وقال “يشرفني أن ألتقي معكم في هذه اللحظة التاريخية الهامة، لحظة دخول بلادنا محطة ديمقراطية جديدة، عقب إجراء استحقاقات انتخابية مختلفة، جددت مؤسساتنا التشريعية والجهوية والجماعية، في انتظار استكمال تشكيلة مؤسسة الحكومة المقبلة، وهي مناسبة لتسجيل افتخارنا واعتزازنا كمغاربة بربح رهان عبور هذه المحطة الديمقراطية الهامة”

واعتبر الانتخابات “انتصار الديمقراطية في بلادنا بفضل تشبث المغاربة بالاختيار الديمقراطي المؤسساتي الدستوري وعلى رأسهم صاحب الجلالة الملك محمد السادس حفظه الله”

اييه. قبل شي عشرين يوم كانت انتخابات مزورة واليوم ولى المغرب ديموقراطي.

شفتو تناقضات حزب كيتجاوز كلشي. عندو امو فالعرس وما عمرو يخاف. ولكن غادية تبقى للتاريخ باللي ماشي هاد الحزب اللي تخسرات عليه لملايير ماشي هو اللي ربح البي جي دي. ماشي هو اللي ختاروه لمغاربة. غادي يبقى فالظل. حزب هجين ما عندو لا راس لا ساس. امينو العام كيقول هدرة اليوم وكيدير النقيض ديالها غدا

موضوعات أخرى

28/03/2024 23:30

جثة مجهولة كلاوها الكلاب فالطريق بين العيون وفم الواد دارت استنفار فالجوندارم

28/03/2024 23:15

نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري

28/03/2024 23:00

الفيفا طالبو الصبليون يوضحو لهم تهم الفساد المالي الموجهة للرئيس السابق روبياليس وللمعتقلين فالقضية

28/03/2024 22:35

اشناهي المواد الغذائية الفاسدة اللي تشدات ف15 يوم درمضان؟ 402 طن فيها 106 من التوابل و60 طن من العصير و35 طن من لحليب و34 طن من السكر واتاي

28/03/2024 22:30

لشكر شتت تنسيق المعارضة.. زرب على بنعبد الله وبنكيران وأوزين وعلن رسميا باسم المعارضة على ملتمس الرقابة

28/03/2024 22:00

الأمير هشام العلوي عطا محاضرة فمعهد الدراسات السياسية فباريس على دور السياسة فالتقدم الاقتصادي فمنطقة الشرق الأوسط و دار مقارنة بين الانظمة ديال الخليج و ديال شمال افريقيا

28/03/2024 21:30

ضوسي السمسرة القضائية.. غرفة الجنايات بكومناف حكمات على عصابة ريبكو ليفها قضاة ومحامين وسماسرة بالحبس والغرامة