عفراء علوي محمدي- كود//

نظمو المحامين المنتمين لهيئة كازا وقفة احتجاجية، اليوم الجمعة فالصباح، قدام المحكمة الابتدائية فآنفا، باش ينددو بقرار رئيس جماعة سيدي بليوط القاضي بإفراغ مكتب محامي كاين فشارع رحال المسكيني.

المحامين توجهو حتى لأمان العمالة  باش ينددو بهذ الفعل، واعتبرو بللي فيه خرق سافر للفصل 59 ديالظهير الشريف رقم 1.08101، بتنفيذ القانون رقم 28.08 المتعلق بتعديل القانون المنظم لمهنة المحاماة، واللي كينص على أنه “لا يمكن تنفيذ حكم إفراغ مكتب محام إلا بعد إشعار النقيب، واتخاذ الإجراءات اللازمة لضمان مصالح موكليه”.

مصدر مطلع مزيان على القضية قال، فحديثو مع “كود”، بللي هذ الفصل أصلا مكايتعلقش بقرار الجماعة الترابية، لكن بحكم صادر عن المحكمة فقط، بمعنى أن “المحكمة إلى صدرات قرار الإفراغ هي اللي خاص تعلم النقيب وتحمي مصالح الموكلين، وماشي الجماعة”، على حد تعبيرو.

وقال المصدر أن الجماعة شافت بللي العمارة غاتريب وبغات تدير ليها الإصلاح باش تحمي حياة الساكنين ديالها والمارة، وأكد أن هذ المحامي كان فراسو هذشي من قبل، والخبار ديال إفراغ العمارة كاملة كان فراس كلشي من شحال هذي، والناس عارفين أنها آيلة للسقوط.

ورجح المصدر بللي الهيئة افتعلات هذ المشكل دالمحامي بلعاني، باش تنسي المحامين فحقوقهم، خصوصا وأنهم من شحال هذي ما خدمو، والبعض منهم كيطالب بتعويض عن هذ الضرر، كيف أن الانتخابات قريبة وضاروري قبل الانتخابات ينوض صداع بحال هذا.

وكان اتهم نقيب المحامين فهيئة كازا، حسن بيراوين، السلطات الجماعية فعمالة مقاطعة الدار البيضاء آنفا، وسلطات الإدارة الترابية بمقاطعة سيدي بليوط، بعدم الالتزام بالضوابط القانونية والاجرائية الجاري به العمل، فاتخاذ قرار إفراغ مكتب محامي.

والعامل ديال عمالة مقاطعة كازا آنفا، فمراسلتو للمحكمة الابتدائية من أجل طلب مفوض قضائي لتنفيذ قرار الإفراغ، قال أن “العمارة قديمة وكتشكل خطر على السكان والمارة”، وأكد أنه اعلم جميع سكان العمارة حول قرار الإخلاء، باستثناء الشقق رقم 2 و3 و4 اللي مستطعش تبليغهم حيت ماكاينينش.