كود احمد الطيب ///
دابا داير سيناريو من السيناريوات الممكنة لانتخابات 2021 التشريعية. شي وحدين كيروجو باللي الاتحاد الاشتراكي حاضر فالمعادلة. ماشي كحزب لاصق مكمل كيف وقع ليه فحكومة بنعرفة بل باغيين يدوبيوه باش يكون عندو حظ فالانتخابات التشريعية المقبلة.
يعني كاينة امكانية يجي احمد رضى الشامي اللي كان سفير للمغرب فالاتحاد الاوربي وجا رئيس للمجلس الاقتصادي والاجتماعي والبيئي. هادو كيعتاقدو باللي سيناريو الاستقلال يتكرر مع الاتحاد. الشامي بحال نزار بجوجهم دازو من المجلس.
غير اللي كاين هو الشامي ماشي اتحادي اتحادي. باه اييه كان اتحادي ديال بصاح ولكن هو غير جابوه وصبغوه. ثم الحزب ضعيف ولا دا ما يفوتش 20 مقعد. هاد الشي اللي قدرو عليه.
قيادي اتحادي علق على هاد السيناريو فتصريح ل”كود” بتهكم. السيد قال ل”كود” “اييه نقدرو نربحو هاديك الانتخابات ولكن خاصهم يعطيونا ناس البام =اعيانو اللي داو بيهم 201 مقعد= ويزيدونا فلوسهم. هاديك الساعة نديو الانتخابات” يختم المصدر.
يعني الاتحاديين براسهم عارفين اش عندهم. واعيين واخا يعينوهم كلهم فمناصب كبيرة ما غاديينش يفوتو عشرين نائب فمجلس النواب المقبل.