كود الرباط ////

واش هاد السياسيين من برلمانيين ووزرا كيهمهم غير السفر والدوران. شي وحدين مازال ما دخلوش من العطلة وكملوها بعطلة ديگيزي.

فنفس النهار اول امس الثلاثاء رئيس مجلس المستشارين البامي حكيم بنشماس ودا معاه صحابو من احزاب اخرى: عبد القادر سلامة وأحمد الخريف، أمين المجلس ونجية لطفي وفاطمة السعد. باش بغاو يضحكو علينا قال ليك باللي رئيس مجلس المستشارين اجرى “مباحثات بسانتو دومينغو، مع رئيس مجلس الشيوخ في جمهورية الدومينيكان، رينالدو باريد، تمحورت حول سبل تعزيز العلاقات بين البلدين والتعاون جنوب-جنوب بين إفريقيا وأمريكا اللاتينية”.

دابا هاد الدولة واش مهمة لينا واش مهمة فالتبادل الاقتصادي لبلادنا. والو ابدا. تخربيق وبغاو يكملو عطلتهم.

وزيرة فحكومة بنعرفة حتى هي بغات تكمل عطلتها ومشات لنفس الدولة. يتعلق الامر بكاتبة الدولة في الصناعة التقليدية والاقتصاد الاجتماعي. كاليك بلا حيا بلا حشمة “زيارة عمل من 27 الى 30 غشت. تصور مفاوضات مانهاست بين المغرب والبوليساريو ما دازت فهادة المدة كلها. واش كاين شي زيارة عمل فيها 4 ايام. ثم اش من تعزيز علاقات تنائية عندنا معاهم فهاد القطاع. لا الصناعة التقليدية لا الاقتصاد الاجتماعي

الحاصول لا يساريين قدام لا اسلاميين كيختالفو. كلشي باغي يفوج على راسو ويدور العالم باش يوصل لشي منصب.