كود الرباط//

فضيحة الكوبل الحكومي باقا كتعطي ريحتها وسط الحكومة، بحيث أنه لا حديث وسط الوزراء والدواوين سوى على تعيين وزيرة التضامن والإدماج الاجتماعي والأسرة، الاستقلالية حيار عواطف، زوجها مديرا للديوان.

وزراء كاعين على التصرف، حسب مصادر “كود”، واعتابرو هادي ضربة قبل ما تسالي 100 يوم من تشكيل الحكومة.

فضيحة وصافي، وزيرة جابت راجلها يكون مدير للديوان، هادشي معجبش لا الوزراء ولا رئيس الحكومة، واخا تعيينها قانوني ولكن ماشي اخلاقي وسياسيا فيه ضربة لهاد الحكومة لي جابت كفاءات نسائية.

دبا علاش هاد الوزيرة متعلمش من وزيرات اخرين فالحكومة، مع وزيرات قادات، فحال فاطمة الزهراء المنصوري، لي جات وقررت تبدا بالحكامة وسط الوزراة كأول حاجة هاد العام، وانتقدت مؤسسة العمران لي ضيعات الملايير على المال العام بسبب الاختلالات الكثيرة لي تورطات فيها ف السكن والتدبير، اضافة الى الاصلاح الهيكلي لي بدات فالوزارة. وزيرة مجابتش عائلتها ولا شي حد قريب ليها باش ديرو فالمناصب الحساسة فحال مدير الديوان.

هادشي كيبين بلي التحالف الثلاثي فالحكومة فيه تشققات وانقسامات ووزراء كاعيين على تصرفات الوزيرة الاستقلالية حيار لي حطات راجلها مديرا للديوان، وزيد عليها الاستقلال حاط نص رجل فالحكومة ورجل ونص فالمعارضة.