كود الرباط//
وزيرة التضامن والإدماج الاجتماعي والأسرة، الاستقلالية عواطف حيار، لي دخلات للحكومة بالفضايح، مور فضيحة تعيين راجلها فمنصب مدير الديوان ومن بعد تراجعت عليه، اليوم ناضت كلفات راجلها بمهام التعاون والتنمية الاجتماعية والشؤون العامة.
“كود” سولت الوزيرة كيفاش عاودات كلفات راجلها بمهمة كبيرة فالديوان، رغم الانتقادات الكثيرة والجدل لي دار هاد الكوبل الحكومي، وكان جوابها ديال “الفقصة” وقالت :”مبغيش نجاوب على هاد السؤال”.
الوزيرة الاستقلالية حلفات ترد راجلها “سوبر مستشار” فديوان وزارة التضامن والادماج الاجتماعي والأسرة، وكلفاتو بمواكبة استراتيجية تنزيل المشاريع” اللي كتهم القطاع، واللي جات فتقرير النموذج التنموي الجديد.
دبا هادي شوهة للحكومة، والوزراء محاملينش هاد التصرف ورغم ذلك الاستقلاليين كيدافعو عليها بشدة.
زعيم البي جي دي لي فالمعارضة، عبد الاله بنكيران قال على هاد السلوكات :”هادي صكوعية وبنادم صكع.. والله يلا حشمونا كمغاربة”.
