نجوى المالحي-كود//

الأنفليونسوز فالمغرب اللي مشهورين فانستكَرام كيطبعو مع العنف ضد النساء. مع العنف ضدهم.

البارح واحد المؤثرة سميتها عزيزة ومشهورة بالسمية ديال “روعة بيوتي” حطات فيديو مع راجلها كيجمعها معاها بتصرفيقة وقالت للناس بغيتكم ضحكو.

https://www.instagram.com/reel/CVY6riOKcQs/?utm_source=ig_web_copy_link

السيدة لي متبعها 3 الميلون ديال البشر معارفاش أنها بالفيديو ديالها كتطبع مع العنف ضد العيالات، وهادشي خلا بزاف ديال الناس يكتبو ليها تعاليق كينبهوها، ولكن هي ماتسوقاتش وخلات الفيديو منشور هادي 20 ساعة.

روعة خرجات في ستوريز وقالت بالحرف “الفيديو الهدف منو الضحك. مغاديش نخسر المود ديالي بهاد التعاليق” وطلقات واحد الضحكة مع ختها، زعما راها مامسوقاش.

صفحة “حشاك” حطات كابتور من الفيديو وتوصلو بعشرات الرسائل من عيالات كيعانيو مع العنف المنزلي سوا من خوتهم ولا باهم ولا رجالهم.

عيب وعار وحشومة يولي الضحك بالعنف. كاينين نساء كثارات كيعانيو في صمت وباغين معامن يدويو. ووحدة طانزة بالعنف او باغية متتبعين كثار وكتسوق لهاد التخلف.