نانسي بيلوسي وصفات نتنياهو بالعقبة للي واقفة قدام السلام.. وطلبات منو الاستقالة
سهام البارودي – كود//
بعيدا عن قال و قال و قال! الصراحة و بالرجولة شكون يستاهل الرحمة ؟؟ لا غي فكر مع راسك و قوليا لاكانت الرحمة كاتنزل و كاتفرق على عباد الله ! شكون يستاهلها ؟ شكون غايكون أحق بيها ؟
واش الناس لي قدمو للإنسانية بزاف د الاختراعات ساهمات فالتطور الطبي و التيكنولوجي و الناس لي فرحونا و بدلو حياتنا للافضل و عتقو الانسانية من الامراض و الموت و لا “بعرور” مسوس الظفار غا حيت هوا كاينتامي لواحد الدين معين فكايشوف راسو “أحق” بالرحمة !
انا بعدا غا ضد فگاع هاد الاصوات لي قاليك ماتدعيش بالرحمة لديغو مارادونا و لستيفن هاوكينغ و لستيف جوبز و لماري كوري و لباستور و گراهام بيل … غاندعي بالرحمة لهاد الناس ! و لا فعلا كاينة شي حاجة سميتها الرحمة غاندعي الله انه يعطيها لهاد الناس و الناس لي فحالهم و ينزلها فقلوبهم حيت خيرهم سابق على الانسانية كاملة ! خيرهم سابق على المسلمين و المجوس و اليهود و المسيحيين و البوذيين و النباتيين عبدة خيزو و البطاطا…
انا بعدا كا إمرأة لابغيت ندعي بالرحمة غاندعي بيها لواحد السيدة سميتها كيمبرلي كلارك لي ختارعات الفوطة الصحية لي كاتغسل ! و مواراها غاندعي بالرحمة للألمان لي ختارعو الطومبون ! و لي كونما هوما كورا خرانا دابا مايجمعوه شراوط ! كورا مازال كانديرو الشراوط و الصوف فحال جداواتنا !
غانبغي ندعي بالرحمة لواحد الميريكاني سميتو گريگوري بينكوس لي ختارع اول كينة د منع الحمل! و عطا العيالات الحق فأنهم يقرروا فوقاش يولدو و فوقاش مايولدوش ! و انهم يقدرو يخرجو يقراو و يخدمو و يخططو للولادة ماشي تخرج ليهم من الجنب !
غانبغي ندعي بالرحمة لمخترع الماكينة د الصابون لي عتقني من الفراكة و مخترع الماكينة د المواعن لي نقص عليا تامارا ! غانبغي الرحمة تنزل على داك العالم لي ساهم فاكتشاف الكهرباء و لطوماس ايديسون مخترع المصباح لي نور ليا حياتي و عتقني من الشمع الله يجعل ربي ينور قبرو !
غانبغي ندعي بالرحمة لغراهام بيل مخترع التيليفون لي بالفضل ديالو اليوم نقدر نهضر مع حبابي و صحابي فجميع بقاع العالم بضغطة زر ! آلو فينك ؟ دير دير فيديو نشوفوك …
غا ندعي بالرحمة لگاع العيالات و الرجال لي دوزو حياتهم فاللابوراطوارات و الجامعات و المدارس باش يختارعو لينا اللقاحات و الادوية و يعتقونا من الطيطانوس و بوحمرون و العواية و الطاعون و الكوفيد و الامراض القاتلة لي كانت فاش كاتجي لشي بلاد كاطحنها عن بكرة أبيها! سيرو الله يجعل قبوركم روضة من رياض الجنة آمين يا ربي
غاندعي بالرحمة لموزار و بيتهوفن و ليوناردو دافينشي و فاطنة بنت الحسين و رويشة و الشعيبية طلال و لگاع الفنانة لي خلقو السعادة لعباد الله و خرجوهم من ظلمات الكئابة و الموت الى نور الحياة و السعادة !
هادو كاملين و گاع الناس لي ساهمو فتقدم الانسانية و ازدهارها راه يستاهلو الرحمة عن جدارة و استحقاق ! اما نتا آ بعرور لي كاتغوت ” لاتجوز الرحمة على فلان” راه نتا بكرك نهار غاتحتاج الرحمة غاتسمع ميساج ” رصيدكم غير كاف للحصول على الرحمة ! لم تخترع و لم تنتج و عشت عالة على الانسانية ككلب أجرب ! المرجو الموت في صمت و شكرا”