سامي العلوي – كود كازا //

فبزاف ديال المدن كتكون الجامعة منارة للعلم وكتحرك الاقتصاد ديال المدن اللي كتبنى فيها، إلا فهاد سطات فاش ولات جامعة الحسن الأول “مصنع متخصص” في إنتاج فضايح “الجنس مقابل النقط” وتشفارت والغش والبيع والشرا وبماركات مسجلة عليها.

تفاصيل حصرية جابتها “گود” كتقول أنه غير اليوم الصباح فامتحانات ديال ليكونومي فلافاك ديال الاقتصاد والتدبير ناضت فيهم روينة كحلة، بحيث ناض شي طالب حتى قرب الوقت يسالي عاد دخل مع الباب جايب معاه الورقة مصاوبة مقادة وعامرة بالأجوبة.

مصدر “گود” أكد على أن الإمتحان مسرب وأن الطالب المعني بالأمر هو وصحابو كانو عندهم الأسئلة من قبل، وهادشي ماشي جديد حيت فالموسم الجامعي ديال 2015/2016 وقعات حالات مشابهة، بحيث خرج امتحان المرافق العمومية في وحدة القانون العام استافدو منو الطالبات اللي خرجات الكونفيرساسيون ديالهم الجنسية كيهضرو على منسق ماستر المالية العامة اللي سدوه ليه بسباب الخنز اللي عطات ريحتو فهاد الضوصي.

فنفس الموضوع، ومللي ناضت الفوضى الطالب مول الفضيحة ناض شفر لأستاذ جامعي فكلية الإقتصاد والتدبير تيليفونو، ودابا راه كلشي عند البوليس ديال دائرة المداومة بالسماعلة، من الكاتب العام ديال الكلية والطالب والأستاذ المشفور.

المصيبة الكبيرة هي أن عميد كلية الاقتصاد والتدبير هو نفسو جمال الزاهي رئيس جامعة الحسن الأول بالنيابة اللي من نهار كَلس وهو كيدير غير فالزبايل، اللي من كثرثها ماقدراتش “گود” كَاع تبقى كل نهار تكتب عليه.

العينين كلهم اليوم على جامعة سطات باش ترجع كيف كانت من بعدما دمروها موالين “الجنس مقابل النقط” وصحاب البيع والشرا فالنتائج.