نجوى المالحي-كود//

الفاشيونيستا زينب المشهورة بلقب “لايدي زي” تقهرات بالأسئلة لي كتوصل بها من عند متتبعات على واش هي سعيدة في حياتها واخا معندهاش راجل، وبعض شي وحدات كيمشيو بعيد وكيعطيو لراسهم الحق باش ينصحوها تزوج.

حفيدة الممثلة الكبيرة مليكة العماري لي مستقرة في برشلونة دارت تدوينة على حسابها في انستكَرام، جاوبات فيها على هادشي وأكدات أنها كانت مزوجة، وحاليا هي فرحانة بلا راجل وماشي ضروري يكون شي واحد في حياتها باش تعيش مبغات.

ووضحات زينب أنها مكتحلمش تزوج لأنها عاشت التجربة من شحال هادي، زيد عليها أنها لحد الان مازال ملقاتش حب حياتها لي تقدر تكون معاه أكثر وحدة فرحانة في العالم.

ووجهات ميساج للعيالات لي كيبقاو ديما يسولوها على الزواج، قالت فيه: نتمنى تكونو فرحانات كيفما أنا فرحانة مع راسي بلا راجل.

https://www.instagram.com/p/CLfKTymlRGB/?igshid=mo8h4sjbdauu