الرئيسية > آش واقع > الغلى فأثمنة بيي العودة للبلاد. وبرلمانيين فالمعارضة كيحتجو عبر “كود”: الحكومة خاص تتدخل وماخاصش “لارام” تستغل الازمة وتغلي على الناس
11/06/2021 08:30 آش واقع

الغلى فأثمنة بيي العودة للبلاد. وبرلمانيين فالمعارضة كيحتجو عبر “كود”: الحكومة خاص تتدخل وماخاصش “لارام” تستغل الازمة وتغلي على الناس

الغلى فأثمنة بيي العودة للبلاد. وبرلمانيين فالمعارضة كيحتجو عبر “كود”: الحكومة خاص تتدخل وماخاصش “لارام” تستغل الازمة وتغلي على الناس

عفراء علوي محمدي- كود//

بدات شركات الطيران والنقل البحري كتعلن على الرحلات اللي غتقوم بتامينها، ابتداء من يوم الثلاثاء 15 يونيو 2021 بمجرد ما علنات وزارة الخارجية والتعاون الإفريقي والمغاربة المقيمين في الخارج على استئناف الرحلات الجوية والبحرية من وإلى المغرب بشكل تدريجي ابتداء من هذ التاريخ.

لكن غيصعاب على أغلب المغاربة يستفدو من هذ الرحلات ويجيو لبلادهم يشوفو عائلاتهم، بحيث أثمنة التذاكر المعروضة غالية بزاف، وكيتراو ثمنها بين 30 ألف حتى ل50 ألف درهم آلي/روتور، وهكذا غيصعاب على أغلب المغاربة يجيو للبلاد.

سكرينات كثيرة ديال أثمنة التذاكر منتشرة بشكل كبير على مواقع التواصل كتصور هذ الغلا “الكحل” كيف وصفوه بزاف ديال المغاربة، اللي علقو محتجين على هذشي، وطالبو الحكومة بالتدخل، حيت الى بقى الثمن طالع هكذا ماغيقدروش  يسافرو للبلاد، فإطار التراخيص الاستئنائية اللي كتعطى للمسافرين.

الحمودي: عملية العبور موجهة للأغنياء فقط وهذا عار

وفتعليقها على هذشي، قالت البرلمانية عن حزب الاصالة والمعاصرة المقيمة فبلجيكا، لطيفة الحمودي، فتدوينة ليها ان هذشي “خزي وعار “، حيت “عملية العبور موجهة فقط لأغنياء العالم، ومقتصرة على اللي غيخلصو كثر وكثر، بينما عملية فتح الحدود فالاصل عندها بعد إنساني”، على حد تعبيرها.

وقالت البرلمانية أن هذا تدبير عشوائي كيغيب فيه المنطق وتنعدم فيه الكفاءة.

مضيان: خاص الحكومة تتدخل والى اقتضى الحال تساهم ماديا وتعاون الجالية

وغير فنفس السياق، حط البرلماني عن الفريق الاستقلالي، نور الدين مضيان، سؤال كتابي لوزير الخارجية، كيساءلو فيه على الاجراءات الاستعجالية اللي كيعتزم القيام بها لتخفيض أسعار تذاكر السفر عبر الخطوط الجوية الملكية والبواخر المخصصة لنقل الجالية المغربية المقيمة بالخارج إلى ارض الوطن.

وفتصريحو ل”كود” على هذشي، قال مضيان أن هذ الغلاء ماتعلنش عليه بشكل رسمي، وهذا فيه مشكل لان الحكومة ماتكلماتش على الموضوع وماتدخلاتش واخا كاين الغلا، وهذشي “ماكيشجعش الجالية المغربية للسفر للبلاد، واخا متشوقة لازيد من سنتين باش تصل الرحم مع عائلاتها”، حسب هضرتو.

وزاد مضيان أن الجالية كتساهم بشكل كبير فالمجال السياحي، وعندها دور كبير فالاقتصاد الوطني حيت بقات عائداتها طالعة واخا كاينة ازمة كوفيد 19، وعلى هذشي كيشوف مضيان أن الجالية خاصها تتكرم من خلال تسهيل ظروف العودة للبلاد وماشي العكس.

وشاف البرلماني المعارض أن ثمن التذاكر ماشي معقول، “هذا كيعني أن الحكومة كتقول للمغاربة يمشيو لسبانيا وتركيا، وشركة”لارام” هي شركة وطنية وخاص تكون مواطنة وتساهم بأثمنة مناسبة”، على حساب هضرتو.

وزاد “خاص الدولة تجيب شركات وتكون تنافسية شريفة باش متحتكرش “لارام”، وخاص الحكومة تتدخل وماتبقاش ساكتة على هذشي، وإلى اقتضى الأمر تساهم ماديا، كما هو الشأن بالنسبة لحكومات كثيرة، هكذا راه كتقول للجالية “لا مرحبا بكم” ما شي “مرحبا بكم”، بعد سنتين من الغربة والبطالة وكوفيد ونزيدو نقتلوهم بهذ الاثمنة… على الحكومة أن تلتفت لهموم الجالية”.

بنشقرون: الشركات فالأزمة كتحتكر وكدير الاثمنة على هواها وخاص الحكومة تراقب

من جهتو، حتى البرلماني عن حزب التقدم والاشتراكية، جمال بنشقرون كريمي، كيستنكر هذ الغلاء ديال التذاكر، لكن كيشوف أن الحكومة ماغيكونش عندها تأثير على هذشي، بحكم أن الشركات كتنتمي للقطاع الخاص وكاينة حرية فالأسعار.

لكن فالمقابل، طالب البرلماني، فتصريحو ل”كود” باش تراعي لحال المغاربة المقيمين بالخارج، من خلال مراقبة الاسعار، وتطبيق القانوت فهذ الاتجاه، والمراقبة والجزر بقوة في حالة مخالفة القوانين ذات الصلة، حيت”فاش كتكون شركة واحدة مختصة فالنقل الجوي او البحري تحتكر، وتضع الاثمنة على هواها”، على عكس فاش كيكونو شركات كثيرة كتكون تنافسية ونوع من المراعاة، حسبو.

وعبر بنشقرون كريمي عن التضامن ديالو مع التضررين والمشتكين من المغاربة المقيمين بالخارج، اللي ماقدروش يشوفو الاقارب ديالهم لاكثر من عاماين بسباب هذ الأزمة، واللي دابا كيواجهو هذ الغلاء فاثمنة التذاكر.

وقال بأن الإجراءات اللي دايرة الدولة فالسفر خاص تكون عندها علاقة مع دول أخرى، “والآن، استعمال موانئ فرنسا وايطالية مكلف بزاف، بلعد المسافة بالمقارنة مع اسبانيا، وهذا حتى هو اشكال سيعاني منه الكثير من المهاجرين، حيت بزاف منهم ماغيقدروش يجيو للبلاد هذ المرة”.

وتبارطاجا على أوسع نطاق فيديو ديال ولد صغير، كيبكي ويغوت بسباب هذ الأثمنة، بحكم أن واليديه ماستطعوش يسافرو للبلاد بسباب الغلا، وعبر الولد على الحزن ديالو لأنه لعاماين ماشافش عائلتو.

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه

29/03/2024 00:00

نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري