كود احمد الطيب الرباط ///

ناصر بوريطة وزير الخارجية والتعاون كيعتابر راسو اهم من كلشي بهاد البلاد. واقعة امور كثيرة فوزارتو. هاد لوزير مقتانع باللي بوحدو ممكن يسير كاع الوزارة. ما خاصو لا بالكتابة العامة اللي دوزها ايام باش كان بنعرفة فالخارجية وشي فترة مع مزوار٬ ما محتاجش للتواصل حقاش كيدير كلشي لراسو حتي كتابة البيانات والتصاور… ما محتاج حتى لشي حد. 

تصورو ان رئيس الدولة عين يوم سادس يوليوز 2020 منية بوستة سفيرة كاتبة عامة بوزارة الشؤون الخارجية والتعاون الافريقي والمغاربة المقيمين بالخارج. يعني 3 اشهر ونص باش تعينات كاتبة الدولة السابقة على رأس الهرم الاداري لوزارة الخارجية. منصب مهم بزاف ولحد الان مازال ما بداتش خدمتها. هاد التعيينات كتفرض انها نهار 7 يوليوز مع التسعود خاصها تكون فمكتبها. ديك الوقت كانت مشكلة كبيرة للخارجية بسباب لمغاربة اللي بقاو حاصلين برا بلا ما نهدرو على امور كثيرة عندها علاقة بالتدبير اليومي لوزارة كبيرة بزاف بحال الخارجية. 

يعني بوريطة ماشي غير معطل امور كثيرة فهاد الوزارة بل معطل تعيين دارو رئيس الدولة. التبرير اللي كيتخبى بيه وزير الخارجية ان بوستة ما يمكنش تبدا خدمتها حتى يستقبلها الملك مع السفرا. هادا عرف ماشي قانون.

دابا من مهام الملك فالدستور السهر على السير العادي للمؤسسات. دار تعيين وطبيعي ان رئيس الدولة باغي الخارجية تخدم فظروف جيدة. حتى ايلى كان هاد العرف ضروري ضروري كان وزير الخارجية يخبر القصر الملكي بهاد الشي والامور تتحل. 

لكن بوريطة باغي يبقى بوحدو يدير ما بغى. دار يدين ورجلين باش يتفك من الازرق اللي كان كاتب عام ورسلو لتركيا باش يتهنى منو وكان معول يجيب ناسو قبل ما يتم تعيين منية بوستة. 

هاد بوريطة نفسو جاب اللي بغى لمديرية الديبلوماسية غير الحكومية والتواصل ودار مسرحية مباراة وهو عارف من اللول شكون غادي يختار وعارف باللي اللي جابها ما عندهاش الشروط اللي هو حطها باش ينتاقيو اللي غادي يكون على رأس هاد المديرية. اللي عينها بوريطة بسرعة جات للخارجية وبدات الخدمة. اللي عينها الملك مازال كتسنى. 

بوريطة مهووس بصورتو وباغي الناس تهدر معاه وصل بيه الغرور انو اللي جبدو وانتاقدو من الصحافة كيمنعو يدخل لانشطة كتهم وزارة الخارجية. دارها تاع بوه وصافي. هاد الشي دارو مع “كود”. حنا كنقولو ليه ماشي الخارجية تاع باك. وغاديين نبقاو ننتاقدو تدبيرك الكارثي للخارجية اللي باغيها تكون كلها فخدمتك. ماشي من حقك تعين اللي كان ساكن معاك قبل فسويسرا وكان كيصايب ليك سباگيتي محمد عروشي كاول سفير ممثل دائم للمغرب لدى الاتحاد الإفريقي. ماشي من حقك تعين سفير فاشل كان كيخدمك اسمو كريم مدرك بعد استراليا فالسويد. ماشي من حقك تهمش اطر كبيرة فالخارجية حقاش عندها كبرياء وكترفض تحدر الراس ليك