عفراء علوي محمدي- كود كازا//

نشطاء كثار على مواقع التواصل الاجتماعي عبرو على انتقادهم لتجسيد كل من منى فتو ودنيا بوطازوت لأدوار مامناسباش معاهم فالحلقة الثانية من سلسلة “بنات العساس” اللي كتعرضها القناة الأولى هذ رمضان، بحيث اعتبرو المعلقين أن الدور ديال جوج مراهقات وهوما فسن متقدم ماجاش معاهم.

بزاف دالرواد نشرو تصور دنيا بوطازوت ومنى فتو ب”الكَرينات” واستهزؤو بيهم، كيف تساؤلوا كيفاش لممثلات قبلو بلعب هذ الدور اللي ماجايش مع لاج ديالهم، واخا ركبو البيريكات وبانو كيتصرفو كمراهقات.

ادريس الروخ، مخرج السلسلة، وضح فحديثو مع “كود” السبب من اختيار الممثلثان لهذ الدور، وقال أن المسلسل كيغطي فترة زمنية ديال 30 عام، ومن خلالو غيبانو الممثلات كيتقدمو فلاج، وفكل مرحلة عمرية عيبانو بلوك فشكل.

وزاد: “بصراحة ماعرفناش علاش هذ الكم ديال الانتقاد والناس ماصبراتش حتى تعرف الأحداث دالمسلسل كيفاش غتطور، بيحث الاحداث اللي دازت دابا كانت فالثمانينات والتسعينات، وغتدور السنوات وملامح وجههم غادي تتبدل، وهذ ليبيرسوناش غادي يتبدلو ويتطورو على المستوى الجسدي والنفسي والاجتماعي ختى للحظة الزمنية ديال دابا”.

ورفض الروخ الكشف على شغ يوقع فالمسلسل من بعد باش مايحرقش الاحداث للمتابعين، لكن فالمقابل صرح بان البنات ماغيبقاوش مع عائلتهم وكاع سياق القصة غيتبدل، وبالتالي غيكبرو وغيجسدو ادوار اخرى فسن آخر.

وحول علاش ماختارش يعتمد ممثلات أصغر سنا لدور الشباب قبل مايجيب فتو وبوطازوت، قال المخرج أنه كيثيق فقدرات الممثلات، اللي اعتبرهم قادرات يجسدو أدوار صغر منهم، وكذلك أدوار كبر منهم فالسن، ومن حقهم، “وهوما ممثلات كبار ومحترفات وقادرات يجسدو أي آج”، على حساب هضرة الروخ.