كود كازا//

فتعليقو على إلغاء السفارة دالمانيا لفيزا شينكَن للمغاربة بسباب “الوضع الوبائي فالمغرب”، قال الطيب حمضي، الدكتور الباحث فالسياسات والأنظم الصحية، أن الحالة الوبائية فبلادنا مزيانة، وكَاع المؤشرات غادية فتحسن كبير، على عكس ألمانية هي اللي عندها وضعية وبائية مقلقة نوعا ما بالمقارنة معانا.

واستشهد حمضي، فتصريح معمم، برسوم بيانية ومنحنيات، كتبين عدد الإصابات والوفيات فالبلدين فحدود يوم الثلاثاء 2 مارس، بحيث فالوقت اللي إصابات اليومية الجديدة فالمغرب ماكتجاوزش 500 إصابة، فألمانيا كتفوت سقف 10 آلاف، وبينما الوفيات الجديدة بكورونا فالمغرب كتحدد بين 10 و20 وفاة فاليوم او أقل كَاع، المانيا فاليوم كتسجل على الأقل 400 وفاة.

ورجح أن هذ القرار اللي تخداتو المانيا راجع ل”سوء التفاهم بينها وبين المغرب” بحق قضايا سيادية كتهم المغرب، اللي انتج عليه قرار المغرب بقطع التواصل والعلاقات الديبلوماسية مع الألمان، وقال أنه من حق كل بلاد تتخذ القرارات اللي كيناسبوها، غير مايكونش على حساب الحالة الوبائية دالبلدان.

ووضح أنه خاص فصل جميع المؤشرات المتعلقة بالجايحة على أي اعتبارات اخرى، باستثناء ما يتعلق بالصحة العامة، حيت “أي استخدام سياسي لهذشي يمكن يضر بالجهود المبذولة، لا هنا ولا فألمانيا أو فكل مكان فالعالم للتغلب على الأزمة الصحية”، وبالتالي غيكونو عندو عواقب سلبية، على حساب ما كيتفهم من كلامو.