عفراء علوي محمدي- كود//

عطا الملك محمد السادس التعليمات ديالو باش يتم تعزيز الصبيطارات اللي فيهوم مرضى فيروس “كورونا” المستجد بالأطر الطبية والصحية التابعة للقوات المسلحة الملكية.

هذشي جا فإطار باش يعاونو العسكر الفريق الطبي فهذ الصبيطارات فمعالجة المصابين بالفيروس، ويرفعو الضغط اللي كتعرف هذ الأيام مع ارتفاع أعداد هذ المصابين، كيف غادي توضع وحدات صحية عسكرية رهن إشارة الصبيطارات العمومية التابعة لوزارة الصحة.

وطلب الملك كذلك باش يتهلاو الأطر الطبية فالصبيطارات بالمصابين بفيروس “كورونا” فجانب التغذية المتوازنة، بتعاون مع ريسطورات كتقدم ماكلو مزانة.

الملك طلب من هذ الريسطورات باش يوليو يزودو الصبيطارات اللي نازلين فيها المصابين ب”كورونا” بالماكلة، صوا بالنسبة للصبيطارات العمومية أو الجامعية ولا حتى العيادات البيبليك، بالماكلة اللي غايحتاجوها المرضى، وتكون صحية وكافية.

وبلا شك هذ التعليمات اللي عطاها الملك جات من بعد الفيديوات اللي بيبلياو مجموعة من المصابين بالفيروس، واللي كيستنكرو التعامل الخايب ديال الاطر الطبية معاهم، وكيفاش ماكايقابلوهومش مزيان وكايخليوهم بالجوع.