كود علي الصافي العيون ///

اليوم لاربعا غادي يجي فوج جديد من لاس بالماس لمطار الحسن الاول بالعيون. من المتوقع حسب مصادر من لاس بالماس ل”كود” غادي يجي 20 حراگ ديالنا. وفق مصادر محلية ل”كود” فان هادو غاديين يوصلو بعد الظهر. هادي وحدة من 4 رحلات فالسيمانا كتجي من كبرى جرز الكناري الى المغرب.

كل رحلة وفق مصدر “كود” كتجي فيها 20 حراگ وكل حراگ كيكون معاه 2 بوليس من البوليس الوطني الاسباني. اي كيكون 40 بوليسي فكل رحلة. هادو كيجيبو حراگة ولكن فنفس الرحلة كيرجعو شي 37 بوليسي وكيبقاو ما بين 3 و4 بوليسي اسباني حتى يتم التحقق من هوية كاع اللي جابو.

مصدر من لاس بالماس قال ل”كود” باللي هاد الطريقة باش ايلى كان شي حراك ماشي مغربي خاصو يرجع مع هاد البوليسي منين جا اي اسبانيا

وفق مصدر “كود” فهاد العملية بدات هادي شهرين. عملية فيها اعتراف اسباني بمغربية الصحرا. بوليسهم كينزل فمطار الحسن الاول كيدوز على بوليس المغرب. وهادا راه عندو معنى كبير عند الجارة الشمالية.