كود هناء ابو علي ///

الخميس 26 شتنبر 2019 فاحد افخم فنادق 5 افينيو بمانهاتن كان فطور لقاء حضر ليه جاريد كوشنير نسيب واقوى مستشار للرئيس الامريكي دونالد ترامب. هاد لفطور نظمو الصحافي المغربي احمد الشرعي مالك عدد من الصحف في المغرب واذاعة “ميد راديو” مع احد رجالات الاعمال الامريكيين الشهيرين. باش يحضر ليه جاريد للقاء بالتزامن مع انعقاد الدورة السنوية للامم المتحدة خاصك تكون قوي بزاف بزاف. رؤساء دول كيتسابقو عليه. كيضاربو باش يبرك معاهم غير 5 دقايق.

ها لفطور حضر ليه ايران ليرمان٬ ضابط فالريزيرف ديال الجيش الاسرائيلي ونائب رئيس “معهد جيروزاليم للامن والدراسات الاستراتيجية”
طبعا غادي يكون النقاش على صفقة القرن. هاد الصفقة كتب عليها الشرعي فمجلة “لوبسرفاتور” باللي فيها جانب مهم هو الشق الاقتصادي واللي خاصو يطبق كيف قال.

الشرعي حضر بصفتو عضو مجلس ادارة عدد من تينك تانك الامريكية.  جيروزاليم بوست اللي جابت لخبار كتبت على حضور الشرعي فهاد اللقاء المهم.

جاريك كوشنير كان جا للمغرب وتلاقى مع الملك محمد السادس وفلقاء ثاني تلاقى مع محمد بن زايد رجل الامارات القوي ووزراء خارجية دول اخرى.

المغرب ولى حاضر فهاد صفقة القرن اللي دارت اجتماعها الاخير فالبحرين. مزيان يكون عندو طريق. طريق دايرها احمد الشرعي.

صحاب دعاة رفض التواصل باي شكل من الاشكال مع اسرائيل كيخربقو. وطلبو من جمعيات مناهضة التطبيع تتحرك كيلف كتبات. غاديين يبقاو يخربقو ويسبو اللي فتح شي طريق. المغرب عندو كلمتو. ما استغلهاش بزاف وخلى ناس الخليج يلعبو بيها. خاصو دابا يجبدها