عفراء علوي محمدي- كود//

اليوم كاينة أول رحلة لعودة المغربة لعالقين فبلجيكا، واللي استفدو منها قرابت 150 مغربي، جايين فهذ الأثناء فطائرة تابعة للخطوط الملكية المغربية، اللي انطلقات من العاصمة البلجيكية بريكسيل فاتجاه مطار أكَادير.

السفارة المغربية فبريكسيل دارت ليست ديال انتقاء المغاربة اللي عندهم اولوية باش يرجعو لبلادهم، فهذ الظرفية اللي كتعرف انتشار فيروس كورونا المستجد فالعالم، واللي اتخذ فيها المغرب قرار تعليق الرحلات من وإلى الخارج.

هذ لاليست كتظم أساسا الناس اللي فوضعية مادية خشة، والناس المراض، والدراري الصغار والشراف، وحتى الناس اللي غيخصهم يرجعو ضروري بسبب طارئ مهني أو اجتماعي.

وهذ الرحلة كتدخل فإطار البرنامج اللي دار المغرب باش يرجع المغاربة الحاصلين برا، وهي من بين الرحلات ال30 اللي علن عليهم وزير الخاجية والتعاون الإفريقي والمغاربة المقيمين بالخارج، ناصر بوريطة، لبارح فالبرلمان.

وقال الوزير بللي هذ الرحلات كتستهدف ما يقارب 4550 مغربي حاصل ف17 بلاد، منها الدول الأوروبية ودول الخليج ودول أخرى فالقارة الأمريكية، وكشف بللي غاتكون هذ الرحلات ففترة ما بين 21 و27 يونيو الحالي.