الرئيسية > آش واقع > الزفزافي خيط فمو والأبلق حطم الروكور دالجوع والمعتقلين بغاو معاملة تفضيلية على باقي الحباسة.. هذي كرونولوجيا إضرابات معتقلي حراك الريف على الماكلة من نهار تشدو لدابا بالأسباب والحيثيات – الجزء الثالث
12/09/2020 14:30 آش واقع

الزفزافي خيط فمو والأبلق حطم الروكور دالجوع والمعتقلين بغاو معاملة تفضيلية على باقي الحباسة.. هذي كرونولوجيا إضرابات معتقلي حراك الريف على الماكلة من نهار تشدو لدابا بالأسباب والحيثيات – الجزء الثالث

الزفزافي خيط فمو والأبلق حطم الروكور دالجوع والمعتقلين بغاو معاملة تفضيلية على باقي الحباسة.. هذي كرونولوجيا إضرابات معتقلي حراك الريف على الماكلة من نهار تشدو لدابا بالأسباب والحيثيات – الجزء الثالث

عفراء علوي محمدي- كود//

كيف عودنا قراء “كود”، فهذ السلسلة كنكشفو على أهم المحطات اللي خاضوها معتقلي حراك الريف فمعركة “الأمعاء الفارغة” من نهار تشدو لدابا. 

وفهذ الجزء غنسردو أبرز الإضرابات على الماكلة اللي دارها المعتقلين فسنة 2019،اللي عرفات تأييد الأحكام الابتدائية الصادرة فحق المعتقلين، وخياطة الزفزافي والحاكي لفمهم، وتدخل المجلس الوطني لحقوق الإنسان لإقناع المعتقلين على تعليق إضراباتهم، كيف عرفات تقديم رفاق الزفزافي لشكاية ضد التامك، وترحيل مجموعة منهم لسجن راس الما ففاس.

الزفزافي والحاكي خيطو فمهم

ف8 أبريل 2019، ومن بعد تأييد الأحكام الابتدائية الصادرة فحق معتقلي الريف، ناصر الزفزافي ناض يدير تصعيد جديد، وقطع الماكلة من خلال الخياطة دفمو بالليبرة والخيط، هو ومحمد الحاكي، اللي خداو 20 عام و15 لعام دالخبس على التوالي.

لاغدليه 9 أبريل 2019، ومن بعد ما زارتهم المحامية أسماء الوديع، قنعاتهم باش يفكو الخيط على فمهم، والزفزافي قال بأنه “فاش حل فمو حكمو علبه ب20 عام، وفاش سدو طالبوه باش يحلو من جديد…”

ورجع الوفزافي يدير إضراب عن الطعام من جديد، ف11 أبريل، فاش نقلوه لسجن راس الما، احتجاجا على وضعو مع “مجرمين” كيف وصفهم فنفس الزنزانة، وتبعوه مجموعة من المعتقلين اللي هوما سمير إغيد، وسيم البوستاتي، محمد حاكي وزكرياء أضهشور، بينما نبيل أحمجيق بدا الإضراب ديالو من 8 فنفس الشهر، وهذشي على حساب ما قال المحامي ديالهم، محمد أغناج.

بالنسبة للمعتقلين فسجن طنجة، فكانو ربيع الأبلق والأصريحي بداو إضرابهم عن الطعام قبل، وربيع الأبلق تحديدا ف20 مارس 2019.

جهات خارجية بززات عليهم الإضراب

ف19 أبريل 2019، مندوبية السجون خرجات على الصمت ديالها بخصوص إضراب المعتقلين، وقالت أن الإضراب ديالهم ماشي بسبب ظروفهم الصحية، لكن لأن جهات خارجية كتحثهم باش يديروه.

وف24 أبريل 2019، دخلو كل من الأصريحي والأبلق للسبيطار بسبب تداعيات إضرابهم عن الطعام، والأبلق فداك الساعة كان كمل 35 يوم على الإضراب اللي دار.

مجلس حقوق الإنسان تدخل

ف25 أبريل 2019 تدخل المجلس الوطني لحقوق الإنسان، وقنع كَاع المعتقلين بتوقيف إضرابهم عن الطعام، وواعدهم بالاستجابة الجزئية لمطالبهم، وتجميعهم في جناح واحد.

ف17 ماي 2019، واحد من معتقلي الريف فسجن طنجة، محمد المجاوي، قرر يدير إضراب عن الطعام إنذاري لمدة 72 ساعة، بينما عائلات المعتقلين خرجات تتكلم على إضراب عدد من أبناءها فنفس الفترة.

وف6 شتنبر 2019، خرجات جمعية “ثافرا” اللي كتضم عائلات معتقلي حراك الريف ببلاغ كتقول فيه ان مجموعة من المعتقلين دايرين إضرابات على الطعام، ومنهم كريم أمغار اللي مضرب من 23 غشت 2019.

وف17 شتنبر 2019، خرج الناشط الحقوقي خالد البكاري كيقول أن أمغار فوضعية صحية صعبة بعد 26 على الإضراب ديالو، بينما ربيع الأبلق حتى هو قفل 12 يوم ديال الإضراب، وراه مضرب حتى على الهضرة، وشاد الركنة فالفراش ديالو.

الأبلق حطم الروكور فالجوع

ف16 أكتوبر دائما من نفس السنة، الموسوعة الإلكترونية ويكيبيديا دونات المعلومات الخاصة بصفحة الأبلق، وقالت انه حطم الروكور فعدد أيام الإضراب عن الطعام، بحيث عندو فالمجموع 151 يوم، وأكثر مدة دارها ديال الإضراب المتواصل فاتت 40 يوم.

وفعلا هذكشي اللي كان، ف20 أكتوبر 2019كمل الأبلق 44 يوم ديال الإضراب على الماكلة، وخرجو المعتقلين كيحذرو من تدهور حالتو، وكيحملو للدولة المسؤولية.

ف6 نونبر من نفس السنة، كشفات المحامية فاطمة المرضي أن نبيل أحمجيق قطع الماكلة بعدما رحلوه لسجن تيفلت، وتحديدا فاللول ديال هذ الشهر، احتجاجا على هذ الترحيل.

قطعو الماكلة بسباب الكاشو

ف7 نونبر، المحامي أغناج علن على دخول ناصر الزفزافي وسمير اغيد وزكرياء أضهشور فإضراب على الطعام، وان هذ الثلاثة موضوعين فزنزانات انفرادية، وماعندهم ما يلبسو ولا باش يتغطاو، وحتى أحمجيق تحط فالكاشو ودار إضراب، وتبعهم محمد جلول اللي حتى هو دار إضراب باش يضامن معاهم. 

وف12 نونبر، قررو المعتقلين كاملين يقطعو إضرابهم على الطعام، بعدما حيدو ليهم عقوبة “الكاشو”، وهذشي على خلفية زيارة وفد رسمي من المحلس الوطني لحقوق الإنسان ليهم لتفقد وضعيتهم، باستثناء الحاكي اللي قرر يستمر فيه، وفنفس النهار إدارة الحبس دطنجة دات جلول للسبيطار بعدما تدهورات حالتو الصحية بسبب الإضراب.

المعتقلين شكاو بالتامك وبغاو “معاملة تفضيلية”

و19 نونبر، رفاق الزفزافي قررو من جديد الدخول فإضراب عن الطعام، وهذ المرة دارو شكاية بمندوبية السجون، كتصعيد جديد، وهذ الأخيرة خرجات ترد وتقول ان سبب إضرابهم وغضبهم باتج لطلبهم معاملة تفضيلية عن باقي السجناء، وهذشي مايمكنش يدار حيت خارج القانون، والإضراب ماعندوش علاقة بسوء معاملتهم فالسجن.

وف26 نونبر 2019، قررو 4 دالمعتقلين يحبسو الإضراب، وكيتعلق الأمر بوسيم البوستاتي ومحمد حاكي وزكرياء أضهشور وسمير إيغيد، بينما لخرين بقاو مستمرين فيه، واللي هوما الزفزافي وأحمجيق، وحتى الأبلق تأثر بزاف بسبب الجوع، وخرجات الوالدة ديالو كتقول للصحافة أن جلدو لصق على عظمو.

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه

29/03/2024 00:00

نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري