الرئيسية > آش واقع > كيفاش ليبيلوط د”لارام” بغاو يقولبو الدولة ويهددوها بالاضراب زمن الحجر الصحي. هاد لملايرية اللي كيشدو حتى 15 مليون للشهر ضامنو مع شعبهم ب3 الاف درهم ودابا خرجو يتحلفو
05/09/2020 10:30 آش واقع

كيفاش ليبيلوط د”لارام” بغاو يقولبو الدولة ويهددوها بالاضراب زمن الحجر الصحي. هاد لملايرية اللي كيشدو حتى 15 مليون للشهر ضامنو مع شعبهم ب3 الاف درهم ودابا خرجو يتحلفو

كيفاش ليبيلوط د”لارام” بغاو يقولبو الدولة ويهددوها بالاضراب زمن الحجر الصحي. هاد لملايرية اللي كيشدو حتى 15 مليون للشهر ضامنو مع شعبهم ب3 الاف درهم ودابا خرجو يتحلفو

كود كازا ///

كلشي دارو ليه اخراج باش يبقاو فبرجهم العاجي. ليبيلوط دلارام من خلال الجمعية المغربية لربنابنة الطائرات سرحو منهم 65 بيلوط فالمرحلة الاولى وسرحو اضعاف هاد العدد من عمال ومستخدمي الخطوط الملكية المغربية ناضو دارو بيان ويهددو الدولة. كيهددو المغرب.

ففيلا ديالهم. بطونوبيلاتهم الواعرة بزاف. جاو كيقولو “اه مستعدين نخفضو كتلة اجورنا ب400 مليون درهم على 3 سنين وهادي اعتبروها مساهمة منا فخطة انعاش الشركة” ولكن وقفو تسريح 65 بيلوط منا بما فيهم رئيس الجمعية وولا ما بغيتوش نديرو اضراب.

تهديد صريح حقير من وحدين ملايرية وبزاف. طبعا السوق عطاهم هاد الراتب ولكن باش لبلاد وقفات عليهم موظفين فلارام تبرعو بصاليرهم كولو وهما ب3 الاف للواحد. يعني ما هامهم الا مصالحهم

هاد الجمعية قالت ببيان ديالها ومن بعد دارت فيديو باش يبقاو فالمغاربة وقالت باللي “هؤلاء الطيارين يعربون عن دعمهم الكامل لخطة إنعاش شركة الخطوط الملكية المغربية، من خلال مساهمتهم بتخفيض كتلة أجورهم بما يناهز 400 مليون درهم، موزعة على ثلاث سنوات، وتوفير تكلفة الفصل الاقتصادي، المقدرة بنحو 250 مليون درهم “.

وقالت باللي هاد الشي دار فيه استفتاء وباللي هاد المبلغ ديال تخفيض رواتب ليبيلوط كافي باش يغطي كتلة اجور اللي سرحوهم من الربابنة وخاص يدرجوهم فورا. لاحظتو ديما خطاب التهديد ديما خطاب الوعيد.

وهددات الشركة باش تبدا حوار وكتهدد الحكومة حتى هي تدخل وسيط باش يخدم قاليك مصالح “لارام”. فين عمركم خدمتو مصالح الشركة. كتخدمو غير مصالحكم.

والاخطر انهم فهاد الوقت فحالة الطوارئ الصحية كيقولو للدولة ” في حالة الرفض فإنه سيتم “إيداع إشعار بالإضراب، والذي سيتم تحديد موعده، من قبل الجمعية المغربية لربابنة الطائرات، لا حقا تبعا لتطور الأحداث “.

تدبير الشركة بعد ادريس بنهيمة كان ما مزيانش. هاد الشي متفقين عليه. ولكن هادو طغاو بزاف. فاتو الدولة وعتاقدو باللي يقدرو يلويو يديها.

هادي مناسبة للدولة تفرض هبتها. اللي بغى يدير اضراب يديرو. راه كاين بيلوط دلارمي غير مريحين يدخلو يخدمو وهادي فرصة للشركة تنقص كثر وتوصل ل160 تسريح من هاد ليبيلوط اللي كيحتاقرو لمغاربة وذكاءهم بصاح.

وا عباد الله بقاو ياخدو تعويضات حتى فزمن كورونا وكيقولو دابا نتضامن مع الدولة.

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه