كود هناء ابو علي ///

الارهابيين كلهم خرجو علي طوعهم. كاع اللي كانو مخبيين خرجو. كلشي ولى مدافع على الدين. كلشي جبد سيفو وبدا يمضي فيه باش يقطع “الارقاب”. فالسعودية ما بقاوش الارهابيين ديالهم اللي علمو الارهاب لهادو ديالنا وللعالم يقدرو يديرو هاد الشي. 

مينة بوشكوية كتبات تدوينة. كفروها. لاحوها فالشارع باش كل واحد عندو شي عقد اللي عندو شي فريستاريون خرج فيها احباطاتو. مع مدة الحجر الطويلة واثار هاد الجايحة على هاد بنادم واللي وقفات كلشي٬ جهلو هاد الدواعش. 

علاش ما كاينة الا لغة الدم ولغة السيف. كشفنا الوجه الداعشي لكثار. الوجه الارهابي بان فيهم. ولاو كيفتاخرو بيه. كيكتبوه فالفايس. كيتنافسو فيه فاليوتوب واخا هادو بجوج كيمنعو كاع انواع التحريض على الدم او الدعوة ليه. 

فقضية الممثل بوبكر رفيق قضية اخرى. دابا السيد تحت الحراسة النظرية. اي انو مشدود. مشدود علي فيديو صورو فدار. ماشي المهم اش قال فيه. حقاش هاداك مجلس خاص. هادوك صحاب الدين ديما كيهدرو على حادثة عمر بن الخطاب باش كان فالحكم. داز حدا دار ولقى معاه مرا والشراب. بغى يزرب عليه الحاكم وقال ليه يا عدو الله واش ظنيتي الله يسترك وانت كتعصى الله. جاوبو المواطن بعد الصواب انا درت معصية وحدة وانت درتي 3 تجسستي علي ودخلتي لبيتي من السرجم ماشي من الباب ودخلي بلا سلام. الحاكم قنانع بالكلام كيف مكتوب فكتب التراث. 

علاش هاد الدواعش ما يطبقوش هاد الشي على الممثل بوبكر. علاش وكيل الملك كيخلي مول الفعل الاجرامي ومشى عند الممثل. من حق اي مواطن فجلساتو الخاصة يدير اللي بغى. 

فاوربا الدول اللي كتأمن بالحقوق والحريات فقضايا مماثلة كيشدو اللي صور واللي سرب. هذا هو المنطقي. كنهدر على قضايا مماثلة. 
كانت النيابة العامة تستدعي هادوك البراهش اللي صوروه وبالاخص اللي سربوه.

اللي مضحك هو كلشي كيبغي يبان مدافع على الدين. علاش اول جواب على اللي قدم رواية مختلفة كيجبدو السيف.