كود- عن Medias 24//
كشف الدكتور سعيد عفيف، عضو اللجنة التقنية والعلمية للتلقيح ضد كوفيد-19، على نسبة المغاربة اللي تلقحو ضد الفيروس، بجوج جرعات من الفاكسان، حسب الفئات العمرية، فحدود يوم السبت 17 يوليوز 2021.
وزاد كشف، عفيف فحديثو لموقع “Medias 24” أن اللي عندهم 75 عام واكثر تلقحو بنسبة 97 فالمية، واللي عندهم بين 65 و74 تلقحو منهم 95 فالمية، واللي بين 60 و64 تلقحو فيهم 94 فالمية، بينما الفئة العمرية اللي بين 40 و59 تلقحو منها غير 69 فالمية.
وناشد عفيف المغاربة باش ياخدو التلقيح، خصوصا الشرائح الشابة الأقل من 60 سنة، باش يتم السيطرة على الوباء بسرعة أكبر.
وشدد على الناس اللي عندهم امراض مزمنة باش حتى هوما يتلقحو بسرعة، وخصوصا اللي مراض بالسكار، والسمنة، اللي يقدرو يتعاداو بالسلالات المتحورة ديال الفيروس بسهولة إلى ماتلقحوش.
وباش يبين عفيف نجاعة التلقيح، عطى مثال بتونس والمملة المتحدة، بحيث هذ الأخيرة خداو 53 فالمية من سكانها اللقاح، وولا عندهم إرتفاع فالإصابات لكن قلة فالوفيات، بينما تونس يالاه 6 اللي تلقحو فيها، وعندهم ارتفاع فالحالات وحتى فالوفيات.
