محمد سقراط-كود///

في الوقت لي المغرب غادي مزيان في مواجهة كورونا وكيتعطى بيه المثل وكيشكل استثناء في هاد القنت، دول حدانا راه نهارت وقوادت عليها بالمزيان، وفي الوقت لي المغرب من الدول الاولى لي غادا وكتلقح الشعب ودارت ارقام مهمة، وكانو كيقولوا لينا راه الى تلقحو الناس لكبار غادي تقل الموت ونرجعوا لحياتنا الطبيعية وبصح الموت قلالت واخا الارقام الكبيرة ديال الاصابات والارقام الاكبر ديال المصابين لي مادارو لا تيست لا والو ، ومع ذلك في عز شهر تمنية غادي يسدو علينا مع التسعود.

شريط ساحلي كامل ومدن سياحية العام الفايت دوزات ازمة ديال بصح كانت خاوية كتصفر وهاد العام يالله تروجات الوقت شوية ، وبداوالناس يتحركو وكاين لي كان ساد وعاود فتح، وكاين لي بدى يرجع الكريديات لي عليه، شوية قاليك البلاد كلها تسد مع التسعود، وبحال الراشيدية بحال الناظور بحال طاطا بحال الرباط بحال سمارة بحال الحسيمة المغرب كامل ساعة وحدة واخا راه التسعود في الرشيدية كتكون باقا خمسة وتلاتين دالحرارة بينما غير عشرين في مارتيل ،وداك جواز التلقيح راه مكيعني والو وغادي يتسد عليك بحالك بحال لي مملقحش، وحتى داكشي ديال الجهوية الموسعة مخدامش كازا واكادير يتطلاو بالكوڤيد وواحد في تينجداد خاصو يدخل لدارو مع التسعود حيت كوفيد كثير في مراكش، ووسط هادشي كتلقى تصاور ديال تجمعات انتخابية ممحتارمينش التباعد الاجتماعي، عاد ان انتخابات قريبة غادي تدار وسط هاد القرارات لي كتبان ليا كمواطن معندها حتى معنى وغير منطقية، ومضرة باقتصاد البلاد.

لحد الان في هاد الانتخابات لي مقربلة الدنيا على ودها، كنشوفوا نفس الوجوه ديال ربع قرن هادي كتعاود ، نفس الناس كيبدلو الاحزاب والتحالفات باش يرجعوا لنفس المناصب لي كانو فاسدين فيها ودارو لاباس منها، لاجديد على الجبهة، عوض هاد الاغلاق مع التسعود لي غادي يدمر اقتصاد ونفسية المغاربة، راه العز ديال الكآبة انك جاي لمدينة ساحلية باش تتبحر وخاصك تدخل مع التسعود، والكآبة الحقيقية انك تكون فشي مدينة سخونة بحال فاس ومراكش والرشيدية النهار كلو الحرارة فايتة ربعين وكتسنى حتى تجي العشية باش تخرج تتقدى او تتبرد او تفوج في مدينة مافيها والو ويقولوليك خاص تدخل مع التسعود وداك جواز التلقيح زيدو فراسك، بقال ملقح وكليان ملقح حتى هو مايمكنش ليهم يتعاملو من ورا التسعود، واش كاين شي كارثة وشي كآبة كثر من كارثة الناس لي كراو الحوانت والمكازات بالملايين في مارتيل والرينكون وطنجة والجديدة ومهدية وباقي المدن الساحلية باش يروجوا هاد الصيف وكلهم امل بان المغرب فتح الحدود للجالية ويجيبوهم حتى لشهر تمنية ويسدو مع تسعود هادي كارثة حلات بالمغاربة ماشي قرار من أجل صحتهم وانقاذ حياتهم، الخير لي تدير الدولة في المغاربة هو تأجل الانتخابات وتطلق الناس يحلو ويبيعو ويشريو ويروجو الدنيا راه خطر الازمة والحزقة والاكتئاب والامراض النفسية لي غادي تجي مع هاد الاغلاق كثر من خطر تعطيل الديمقراطية شي شهورة.