سامي العلوي – كود الرباط //
“المبادرة الطلابية” هادي سمية ديال تنظيم ماتعرفو جمعية ماتعرفو نادي، ماتعرفها اشناهيا، أسسوها خوانجية من أصحاب التكفير داخل جامعة سطات قاليك كيديرو بها دروس الدعم والتقوية، وهما دايرينها بطريقة غير مباشرة بهدف أخونة جامعة الحسن الأول وخاصة كلية العلوم القانونية والاقتصادية والسياسية.
نهار الخميس الجاي جايبين الفقيه صاحب الشيخة اللي دار ضجة فشهر رمضان، باش يعطي محاضرة قاليك في “المجتمع ومنظومة القيم”، هذا جاي لمحاضرة ولا يدير الرقية لكلية الحقوق؟ حيت راها ولات فيها “الجنابة” مع رباعة ديال المكابيت أصحاب تواصل “الجنس مقابل النقط”، اللي راهم كيدوزو دابا فمحكمة الاستئناف فسطات.
مصادر كشفات ل”كَود”، بأن المعضلة الكبرى اللي ماعارفهاش مدير الحي الجامعي أنو هاد المبادرة فيها عدد من الدخلاء على الجامعة واللي هوما أصلا ماشي طلبة، منهم اللي موظفين فالتعليم ومنهم اللي شومور كيجيو يزهاو مع الأخوات والإخوان، وطبعا كاينة أهداف خفية من ورا هاد النشاط اللي كيسميوه “الأسبوع الثقافي”، الثقافة المخير فهاد الخوانجية مايعرفها باش منفوخة، المخير فيهم ضارب ماستر ولا دكتوراه ولا موظف بلايلاها يللاه.
إيوا هادشي راه خصو يوقف عند حدو ونعرفو مدى قانونية هاد المبادرة، و واش الثقافة فيها غا الشيخ مافيهاش الشيخة؟
