اسماء غربي- كود//

وزارة الخارجية الأمريكية، نشرات تقريرها السنوي على الحرية الدينية فالعالم فعام 2021.

وقالت الخارجية فتقريرها على المغرب، ان القيود مازالة مفروضة على الأقليات الدينية فبلادنا. واكدات انهم كيعيشو فخوف من المجتمع، وكيخافو لا عائلاتهم ينبدوهم والمجتمع يطنز عليهم، وحتى التمييز فالخدمة ، والعنف اللي يقدرو يمارسوه عليهم شي متطرفين، وهادشي علاش كيمارسو ديانتهم فسرية تامة.

وهضرات الخارجية فتقريرها على قضية البنت الطاليانية من أصل مغربي، إكرام نزهي، اللي كانت تدانت بالحبس 3 سنين ونص، بتهمة “المس بالمقدسات الدينية” فمواقع التواصل الاجتماعي ف 2019، وخرجات ف23 غشت اللي فات.

التقرير هضر حتى على قضية الممثل رفيق بوبكر، اللي كان بان ففيديو فدار كيهضر وكينكت وكيضحك وفيلماوه شي وحدين بلا اذنو، وتعتاقل فماي 2020، بعدما تنشر الفيديو فمواقع التواصل، بسبب “إساءتو للدين الإسلامي والمس بحرمة العبادات”، ومن بعد تطلق سراحو بكفالة.

واشار التقرير لحرمان المغاربة المسيحيين من الزواج المسيحي ولا المدني وحتى الگنازة بطيرقتهم، وتأسيس الكنيسات ويسميو سميات مسيحية.

وتطرق التقرير للناس اللي تشدو حيت فطرو فرمضان وقال ان عددهم واصل لـ79 واحد.

وقالت الخارجية الامريكية ان الحكومة المغربية ماسمحاتش للجماعات المسلمة الشيعية تتسجل كجمعيات.

https://www.state.gov/reports/2021-report-on-international-religious-freedom/morocco/