كود كازا//

شركة “Evian إيفيان” دارت تغريدة عادية فتويتر، نصحات فيها الناس بشرب لتر واحد على الأقل من الما فاليوم، باش يحافظو على صحتهم، حتى كتفاجأ بالكم الهائل ديال السبان والمعيور من طرف شي وحدين، اللي اعتبرو هادشي استفزاز ليهم، خصوصا وأن التويت تزامن مع أول نهار فرمضان ففرنسا.

RT Si vous avez déjà bu 1L aujourd’hui ! ????????

— evian France (@evianFrance) April 13, 2021

المتخلفين ماخلاوش للشركة بالسبان، واخا ماكان عندها حتى شي سوء نية، ومولفة على طول العام كتنصح الناس بشرب الما ماشي حتى دخل رمضان، الشي اللي خلاها تعتذر مكرهة فآخر المطاف، وتشرح للناس أنها ماقصداتش تستفزهم.

Bonsoir, ici la team Evian, désolée pour la maladresse de ce tweet qui n'appelle à aucune provocation!
????????✨

— evian France (@evianFrance) April 13, 2021

هاد الناس مفافيين غير بوحدهم وكيحسو بأن اي حاجة تدارت او تقالت فهي ضدهم، دايرين روينة ومنوضين الصداع على والو، وكيتهمو الشركة بالإسلاموفوبيا، واخا عارفين مزيان أنه بامكانهم يشربو لتر ديال الما ولا كتر كَاع حتى من مور المغرب، والبيبليكاسيون مافيها حتى شي تنقيص منهم.

وكاين اللي فهم ان الشركة ماقاصدة والو، خصوصا بعدما اعتذرات باش ماتخسرش شريحة واسعة من الكليان، ولكن تفلسف على توقيت نشر التدوينة، وقال أن “إيفان” كان عليها ترد البال باش ماتجرحش مشاعر الصايمين.

لكن كاين مجموعة من المسلمين بعقلهم، واستنكرو هاد ردود الفعل اللي ماعندها حتى معنى، منهم واحد قال: “الشركة مولفة تدير بحال هاد المنشورات على طول العام، هادشي ماعندو حتى علاقة برمضان، الله يهدينا حيت والله غاديين نيشان للحيط مع ناس بحالكم”.

وواحد رد وقال: “انا مسلم وفرنسي، هاد التويت مافيه حتى حاجة كتصدم وماكيستهدف حد، الدين شخصي، والشركة دير وتقول لي بغات، وكنقول لزملائي الروحيين يدوزو وقت أقل على مواقع التواصل، ويركزو على شي حاجة كتنفع”.

Je suis musulman et français. La religion est personnel, et pleine de pudeur. Evian fait ce qu'il veut. Quand à mes jeunes collègues "spirituels", ils devraient passer moins de temps sur les réseaux sociaux et passer plus de temps à réfléchir comment se rendre utile.

— Hannibal smith (@DaviddiegoSmith) April 13, 2021