عفراء علوي محمدي- كود//

اختلت هيئة الحكم فملف الصحافي المعتقل، سليمان الريسوني، من أجل البت فالحكم، اليوم الجمعة، كيف طلبات بالإحضار ديال الفوري من سجن عكاشة.

وتخدات هيئة الحكم، برئاسة القاضي بوشعيب فريح، هذ القرار، من بعد اطلاع الريسوني على تقرير فيه تفاصيل وقائع المحاكمة من خلال كاتب الضبط، قبل ما يعلم هذ الأخير المحكمة بأن المتهم توصل بيه وقراه.

وطالب دفاع المطالب بالحق المدني، محمد آدم، فجلسة اليوم، المحكمة بتعويض آدم ب50 مليون سنتيم لجبر الضرر اللي وقع ليه بفعل واقعة الاحتجاز والاغتصاب، اللي متابع بيها الريسوني.

وخلال هذ الجلسة، طالب ممثل النيابة العام بالحكم على الريسوني بأقصى العقوبات، حيت قال أن التهم الموجهة للريسوني ثابتة فحقو.

وتم فجلسة اليوم الاستماع للشاهد (أ.م)، اللي قال للقاضي أن المطبخ فعلا مفتوح على الصالون، وماكيتوفرش على ابواب، عكس ما قال المشتكي بالريسوني، اللي كان صرح بإغلاق باب الكوزينة عليه.

أما بالنسبة لاقفال غرف المنزل، قال الشاهد أنه ماعارف والو عليها.

وزاد (أ.م) أنه ماعرفش كذلك طبيعة العلاقة بين آدم والريسوني، او واش كاينة بيناتهم علاقة حميمية، وانه تعرف عليه وسط دار الريسوني نيت، فاش جا يصور معاه حول موضوع الأقليات فالمغرب، فإطار مشروع خدامة عليه مرتو فهذ الباب.

وصرح (أ.م) أنه ماكملش هذ المشروع، وكان صور مع آدم فيديو تقريبا فيه 20 دقيقة.

والريسوني اليوم قفل اليوم 92 ديال الإضراب عن الطعام، واليوم 9 ديال الإضراب عن السكريات، احتجاجا على محاكمتو فحالة اعتقال، وعدم إحضارو لمتابعة الجلسات، بحيث اليوم كانت الجلسة الساتة اللي كادوز فغيابو.