ف بيان مشترك نشرو البيت الأبيض.. المريكان و17 دولة اخرى كيطالبو بالإفراج الفوري على كاع الرهائن للي ف غزة
عفراء علوي محمدي- كود//
مجموعة من المتتبعين اعتقدوا أن الفنانة دنيا باطمة، المدانة ابتدائيا في ملف التشهير عن طريق حساب “حمزة مون بيبي”، (اعتقدو أنها) تشدات فالحبس، بعدما تحكم عليها ب8 شهور نافذة، بحال ختها ابتسام باطمة اللي تحكم عليها بسنة وهي ديجا معتقلة، لكن هذشي ماكاينش، بحيث دنيا مزالة فحالة سراح.
المحامية فهيئة الرباط، مريم جمال الإدريسي، كتوضح علاش “دنيا باطمة تحكم عليها بعقوبة حبسية نافذة، ولكن هي كانت في وضعية سراح وماشي فوضعية اعتقال احتياطي بحال ختها ابتسام باطمة، وبالتالي مع الحكم الابتدائي كل واحد كيحافظ على الوضعية اللي هو فيها، بمعنى: ختها مادام ماخداتش السراح المؤقت كتبقى رهن الاعتقال الاحتياطي وكيتحسب الاعتقال ديالها من العقوبة ديالها النافذة المتمثلة في سنة، ودنيا باطمة عندها وضعية سراح غتحتفظ بيها، فانتظار يطعنو بجوح فالأحكام الابتدائية، ومن بعد ما يخرج المقرر الحائز بقوة الشيء المقضي به عاد كيمكن لينا نتحدثو على مرحلة تنفيذ العقوبة، لأن الدعوة ستنشر من جديد امام محكمة الاستئناف، ويمكن ان تغير محكمة الاستئناف هذا الحكم الابتدائي، وممكن توصل القضية لمحكمة النقض”.
وفيما يتعلق بالأوسمة الملكية اللي حصلات عليهم دنيا باطمة والمصر ديالهم، كتقول الإدريسي “كاين مجلس خاص بالأوسمة عندو الصفة ديال مجلس تأديبي، عندو عقوبات متدرجة، الإنذار والتوبيخ ثم حبس الوسام، ومايمكن للقرار ديالو يتخذ إلا بناء على النسخة ديال الحكم اللي كيقضي بالإدانة، وكينعقد المجلس وكيمكن المعنية بالأمر داخل أجل شهر من الجواب على الوضعية اللي راها فيها عن طريق مذكرة كتحررها شخصيا أو عن طريق الدفاع ديالها، وكيبت مجلس الأوسمة فأحد العقوبات المنصوص عليها في ظهير الأوسمة الملكي ديال المكافأة الوطنية”.