سهام البارودي-كود//
وجود المرأة فالحياة السياسية و فمناصب المسؤولية نقاش كبير و مازال لحد الآن كايتطرح حتى فالدول لي فايتانا بأشواط كبيرة فالحقوق والمساواة و لي بصح فيها العيالات فحالهم فحال الرجال عندهم نفس الحقوق و نفس الواجبات !
حنا فالمغرب راه عارفين خروب بلادي ! ماكاين علاش نكعاو حيت ماكاينينش بزاف ديال العيالات فالحكومة الجديدة ! حيت تواجد العيالات فالحياة السياسية و فمناصب المسؤولية يتناسب اضطرادا مع منسوب الوعي لي كاين فالبلاد و الدرجة لي وصلات ليها المرا فيها
حنافبلاد مازال بنادم فيها كايشوف المرا ناقصة عقل و دين ! داك الناخب براسو لي غايصوت على المرا هوا تلقاه مامسيفطش بنتو للمدرسةحيت بالنسبة ليه البنت خاصها تجوج و تگلس فالدار !
الشعب لي غاتحط ليه مرا فمنصب المسؤولية هوا براسو كايشوفها غازايدة ناقصة وكايغني ديك اللازمة ديال ” وا تقراي تاتعياي و تاخدي بناي ! آآآدرف ” ! داكشي علاش انا شخصيا فاش شفت التصويرة ديال الحكومةالجديدة و شفت منسوب التيستوستيرون العالي لي فيها ! ماجاتنيش غريبة !
عندنا الحكومة لي كانستاحقو ! داكشي لي كانستاهلو لاعيالات و لا رجال !حيت الناس فاش كانو كايدافعو على الحقوق و المساواة و كايدخلو البنات للمدرسة باش يقراو و كايحاربو الفكر الذكوري و كايعلموالمواطنين ديالهم بلي التعامل بيناتهم خاصو يكون على اساس الاحترام بعض النظر على الجنس !
حنا كنا مازال كانقراو فالتيلاوة بلي ” الأب يقرأ الجريدة و الأم تسرد سريدة ” ! فاش كانو دوك البلدان لي فايتينا بأشواط خدامين على معركة المساواة كانو حنا مازال عندناالرجال كايگولو ” المرا حاشاك”التاريخ ماكايظلم حد ! و فهادشي ديال الحقوق و الحريات مول المليح باع و راح ! فشلنا باش نخلقو عيالات سياسيات قادات و وازناتبالكاريزما اللازمة للمعترك السياسي! يشدو مناصب حساسة و وزارات كبيرة ! علاش حنا ضروري المرا نعطيوها التضامن و الطفل !؟علاش ضروري حتى فاش نعطيوها شي وزارة تكون فيها ريحة سيريلاك و الخروق ؟!
خاصنا تاحنا نشوفو شي نهار مرا وزيرة الداخلية ! علاش لا ؟ ياك عندنا نسا من طينة الوالية زينب العدوي ! او لا ؟! و لكن باش نوصلو لهادشي خاص اولا العيالات القادات بهادشي ! و ثانياخاص الشعب لي قاد يوجد هاد العيالات و يقري البنات و يوعيهم خاص الدولة تخلق مساواة حقيقية بين المواطنين و خاص هاداك المواطن تقتانع بلي مابقاتش فواش راجل و لا مرا ! بقات فالكفاءة ! و فاش يمشي يصوت يصوت على الكفاءة ماشي على اساس الجنس ديال المرشح !
نهار نقطعو هاد الاشواط كاملين ! و يكونو عندنا هاد الشروط كاملين ! ديك الساعة نقدرو نكعاو حيت ماعندناش عيالات بمافيه الكفايةفالحكومة ديالنا ! اوناطونضو خاصنا نخدمو على هاد الاوراش بجدية و خاص تكون ارادة سياسية حقيقية لادماج المرأة فالحياة ( ماشيالحياة السياسية ) الحياة بعدا … عاد نشوفو حوايج خرين
