د. مراد علمي – أستاذ جامعي، كاتب ومترجم

—

 

ضروري نـطـرّقـوا ألــْـهاد التعيين اللي تـم ّ على وزارة الثقافة أو الإتصال، حنا ما كاتهمـّـناش السمية ولا ّ الشخص اللي ديما غادي نحتارموه، نـكــنـــّـو ليه الإخاء، المحبة، يعني ما غاديش نتكـلـــّـموا على الشكل، ولاكن على المضمون، يعني الوزارة، أو واش محمد الأعرج عندو شي رصيد فى ميدان الثقافة ولا ّ لا، حسب المعطيات القليلة، المنعدمة تقريبا اللي كانتوفــّـروا عليها اليوما هي أنه عندو دكتورة فى القانون العام، كان كايدرّس فى كلية الحقوق فى جامعة فاس أو عـضو الإتحاد البرلماني العربي من 2011، يعني لا الثـقافة، لا عالم الإتصال وارد فى ختصاصاتو ولا معروف من طرف أهل الفـن، الكـتــّـاب ولا ّ المـثـقـفين، ما عـندو ولا مرجع واحد فى هاد الميدان اللي غادي يشرف عليه، يعني بحال إيلا كـلــّـفـتي الـعـتروس يحضي ليك الـجــّـنان.

 

يمكن لينا نقولوا بكول وضوح، بلا أي مجاملة ولا ّ تملــّـق، السي الأعرج ماشي الشخص المناسب فى المنصب المناسب، لأنه ما عمـّـرو غادي يفهم عالم الثقافة، ماشي غير اللي كايعرف يقبط السـّـتيلو صافي راه عندو باع فى الـفن، تاريخ الحضارات، اللغات، الفكر، الإبداع، المسرح،  السينما، الترجمة، الرقص، حسب تكوينو الأكاديمي وزارة العدل هي اللي غادي تقبل عليه، أمــّـا عالم الثقافة بعيد عليه “بسنوات ضوئية”، يعني باش نوصلوا ألـْـتمـّـا خصـّـنا كثر من 50 عام أو حنا مسافرين، بعبارات خرى ما عند محمد لــَـعـرج حتى شي رتباط بهاد الميدان، ولاكن فى المغـرب “لا تسـتغـرب من عـبـثـيـســتـان”، واش غادي ينهض بعالم الثقافة بالبنود، المرافعات، المنازلات، العقوبات، الفصول، الغرمات؟ لا! الثقافة خـصـّـها أمــّـاليها، أمــّا المتطفلين ما عندهم باش إفيدوا هاد القطاع اللي مهمـّـش أصلا، لأنه ماشي فى صالح التيار المحافظ اللي باغي لـجميع المـثـقفين، الصحافيين، رجال الفكر، الفنانين غير الإنبطاح، الـذل، الســّـلاسل، اللــّــقــاط أو “الـشــّـاليمو”، فى عوط توسيع رقة الحريات، الديمقراطية أو التحرر من بطش القوي، الغول على حساب الضعيف.

 

لوزير الوحيد اللي كانشوف لحد الآن كان فى المستوى المرغوب فيه هو الأستاذ محمد الأشعري، هادا هو “محمد” ديال بالصـحّ، الأديب الكبير، صاحب الذوق الرفيع، الأخلاق الحميدة، الغني عن التعريف عند الفنانة، الكـتــّـاب، أمـّـا السي محمد الأعرج، سمعوا عليه أنه نائب برلماني من الحسيمة، بغاوْا إداويوْا داك الجرح اللي كـولـــّو بزق،دم، قيح، “ريثما” إتــّـهـدّن الوضع تـمــّـا، ولاكن اللي ما بغاوش إفهموا المسؤولين دياولنا هي أن لا فى الحسيمة لا فى بلاصة اخرى فى المغرب جل الأحزاب، يمكن العدالة والتنمية حالة ستثنائية، ما عندهم حتى شي متداد جماهري، حتى شي مصداقية، ما عندهم فاش إفيدوا الدولة، سوّل المغربي التــّـالي غادي إقول ليك: “الأحزاب المغربية؟ آ العـيادو بالله، ما كاين غير خطف أو هـرب”، ولا ّ كيف شار المثل المغربي القوي: كـاملين مسقيين بمـغـرفة وحدة.

 

بحال حزب الحركة الشعبية اللي كاينتامي ليه السي “لـــَـعـرج”، هاد الحزب كايقتات المقاعد غـير من إثارات النعرات القبلية، العرقية، باش كـمــّـلها زاد عليهم حـصــّـاد، الكفاءة الوحيدة؟ العرق، تـزاد فى تافراوت، المغرب ديال جميع المغاربة أو ماشي ديال هاد القبيلة ولا ّ لوخرة، أو جدودنا الأمازيغ جاوْا من الحبشة، لأنهم كانوا ديما تابعين الماشية حتى ما لقاوْا لاين إزيدوا، حـيت حـدّهم المحيط، على داك الشي كايتوفــّر المغرب على أكبر كم ّ من الأمازيغ، أمـّـا المغرب عاشوا فيه هادي كثر من 90000 عام غير الزنوج الأفارقة اللي كايتــّـعتابروا لحد الآن من أقدم الأجناس البشيرية، الطروحات لوخرى غير تمويه، تكتيكات، مناورات قصد ربح القوت أو طريـيـف من الريع السياسي.

 

أمــّـا إجيوْا بعض العنصرين بحال الأب الروحي ديال “حزب الحركة الشعبية”، أحـرضان، أو إقولوا لينا بأن المغاربة كولــّـهم أمازيغ أو كايعيشوا فوق أرض أمازيغية، هادوا ما مطــّـالعين لاعلى التاريخ، لا على جدور اللغة الأمازيغية اللي هي لغة حامية، يعني حبشية (إيـتــيــوبــيــا)، ما هوما كايفـكــّـروا بطريقة منطقية، أو كاين اليوما البعض اللي باغيين إلعبوا بالعافية، باغيين إحـلــّـوا بيبان جهنم.

 

كانفتاخروا بجدودنا، حبابنا، أصهارنا الأمازيغ أو اللي بغى يشعل عافية فتيلة القبلية، العرق ما عمـّـرو يفلح، لأننا شعب واحد، مضّـامنين منصاهرين، فاش مات مول الحوت فى الحسيمة، المغرب كولــّـو نفاجـر، ماشي غير أهل المدينة، أو هادا كايدل على وعي كبير أو على قطيع الطريق على الأساليب الحاطة من كرامة الإنسان اللي فى الأصل خصها تكون محمية من طرف دستور 2011، اللي ما جات فيه ولا بنص واحد خاص بيها.

 

ضروري نراعيوْا جميع الحساسيات أو ما نـغــلـــّـبوش هاد الإنتماء الإثني ولا ّ الجهوى على لاخور وإلا ّ غادي ندخلوا فى صراعات عرقية ما فيها ما يتشاف، لأن جميع الحروب اللي كاتعرف منطقة الشرق الأوسط هي إمـّـا عرقية ولا ّ دينية.

 

كانحيـّـي من هاد المنبر،المجتمع المدني، الشعب المغربي الذكي اللي لحد الآن ما عمـّـرو تبـنــّـى خطاب التفـرقة ولا ّ العرق، كانقصد كاكـولّ، أمـّـا أقلام الأقليات المتطرفة، المتشددة موجودة فى جميع الدول كيف ما كان نوعها، جميع الإخوان المـثقفين،  المفكرين، الصحافيين اللي كايناضلوا من أجل مغرب حسن، فضل ما عـمـّـرهم سـخــّـروا ريشتهم باش تخدم العـرق، أمـّـا الأحزاب السياسية ديالنا كاينطبق عليهم المثل الجميل، العميق باللغة المغربية: بنادم اللي تخرج ليه الفضيحة من الـدّار عـمـّـر وجهـو ما يـحمار.

 

لازم نعرفوا ستراتيجية وزارة الثقافة الجديدة أو شنو هو المشروع الثقافي اللي غادي إقدّم لينا السي لـــَـعـرج، واش غادي يبقى كايحقـر اللغة المغربية، الذات، بحال اللي عملوا لوزارى قبل منــّـو ولا ّ غادي إجيب أفكار جديدة فى ما يخص تصنيف “جائزة المغرب للكتاب” ولا ّ غادي تبقى منحاصرة على اللغات الثلاثة: العربية، الأمازيغية، الفرانساوية؟ ولو الفرانساوية ماشي لغة وطنية أو ضروري نخلقوا ليها جائزة خاصة بيها بجانب اللغات الأجنبية لوخرى، ولاكن ما كانضنش أن السي لــَـعـرج عندو جرؤة، رغبة  إصـحـّـح، يجبر هاد الضرر المادّي أو المعنوي اللي ما عندو حتى شي مبرر.

 

لغة الشعب، لغة المغاربة الحية كاتــّـدبح كولا ّ نهار، كاتــّـهان، بلا حسيب ولا رقيب، علاش؟ لأن النخبة المحافظة كاتخاف من الشعب لا يخرج على الطاعة، كاتخاف من لغـتـو لا إزاحمها، إضايقها، إحاسبها، جميع اللغات اللي كاتــّـربط بالدين كاتضمحل، كاتموت بحال الاتينية، لغة الفاتيكان، لأن ما حـدّ المجتمع كايتقدم إلا ّ أو كايبتاعد على الدين، باش يفصل فى آخر المطاف الدين على السلطة، لأن خلط الـرّوحي بالدنياوي ما كايخدمش الدين ولاكن كايعفــّـنو، لذلك ضروري يبقى الدين مسألة شخصية أو ما تسخــّروش النخبة المحافظة قصد تركيع، تهميش، تجويع الشعب.

 

أو باش نختم شارك السي لـَـعـرج فى واحد الندوة كان شعارها: “القضاء وسيلة لترسيخ العدالة، حماية الحريات وضمان احترام حقوق الإنسان”، إيوا ورّي لينا حـنــّـة يـدّيك، يا الله! فاين هي العدالة، حماية الحريات، حقوق الإنسان أو لغة المغاربة مغـيـّـبة؟ ولوْ الأونيسكو شارت ألأهمية حترام، تشجيع اللغات الحية اللي يمكن لينا نعتابروها أمـّـة حقوق الإنسان، ولا ّ قـطع اللسان، “تكميم أفواه المستضعفين، الطيبين”، حسن؟ نـكـونوا منصفين، واقعيين أو نشوفوا بعدا شنو غادي يـقـترح علينا محمد الأعرج كمشروع ثقافي.

 

ولان من دابا كانــّـبــهوه، النتائج الملموسة هي اللي كاتهـمــّـنا، أمـّـا هضرة، لغة السياسيين المغاربة اللي كولـّـها حطب أو خشب، يعني لغة البخور، الكنيسة، ما بقى فيها ذوق، طارت منــّـها الـبركة، فى زمان كوكل، يوتيوب، البورطابلات الذكية ما بقى حـدّ كايتيق بالخرافات الـرّاشية، فى رمش العين يمكن ليك أتــّـأكـد من هاد المعلومة أوْ لوخرى، تسوّل، تنظم وقفة، تكذّب هاد الخبر أوْ لاخور، ما بقى حـدّ كاري عـند “بـنـي غـفــلـون” اللي دفعوا السـّـوارت من شحال هادي لــَـمــّـالين المـَـلك، لأن الحركة مييتة أو ما بقى حـدّ كايقبل على هاد المنتوج القديم اللي كلاه الصـّـدى من الداخل أو من بـرّا.