20/04/2024 16:30
فضايح مؤتمر المهندسين المعماريين.. اعتداء همجي من مهندس على مصور “كود” وشي وحدين منهم بغاو يرشيوه باش يسمح للمهندس اللي كيهدد بحقارة
كود- عن Le Parisien //
كشفات جريدة “لو باريزيان”، فعددها داليوم الاثنين، أن التلميذة اللي كانت سبب فقتل المعلم ديالها، ساميويل باتي، من بعد اتهامها ليه هي وباها ب”الإسلاموفوبيا” بسبب عرضو لرسومات على رسول الاسلام محمد، (كشفات) أنها كانت كتكذب، بحيث ماكنتش حاضرة فالحصة ديالو داك النهار، وماشافت حتى كاريكاتير.
الوالد ديال التلميذة ز.، اللي عندها 13 العام، كان دار فيديو كيتشكى من هذشي، وبلغ هذشي لإدارة المؤسسة، واخا التلميذة ماحضرات وماشافت حتى رسوم، فالحصة ديال 25 نونبر المخصصة لحرية التعبير، واللي كانت قبل 10 أيام من ذبح باتي بداك الوحشية على يد إرهابي.
وكان الأستاذ بين للتلاميذ مجموعة من الكاريكاتيرات، منها كاريكاتير لمجلة “شارلي إيبدو” على رسول الإسلام، قبل ما يطلب من المسلمين باش يغمضو عينيهم إلى بغاو وحسو أن هذ الرسوم ممكن تقيسمهم بشكل او بآخر، لكن فهذ الحصة كانت ز. غايبة، بل وتبين أنها كانت كتغيب بزاف، وغير صاحبتها اللي تكلمات ليها على الرسوم.
وحسب الأبحاث اللي داروها المحققين ديال إدارة مكافحة الإرهاب SDAT، تبين أن البنت كانت كذبات على باها، المدعو إبراهيم شنينة، وبينات تأثرها بسبب الرسوم باش تاكد أنها كانت حاضرة، واخا تم استبعادها من الحضور بسبب غياباتها المتكررة.
محامية عائلة باتي، فيرجين لوروي، قالت فتصريحها لصحيفة “le parisien ” أن هذ الكذبة خطيرة، وخاص الرجوع لأسبابها وظروفها، لكن من جهتو محامي التلميذة ز.، مبيكو تابولا، قال أن تحميل المسؤولية دهذ العمل الإرهابي لبنت عندها 13 لعام، ولومها، ماعندو معنى، وقال انه خاص لوم الأب اللي نشر فيديو كيتهم فيه الأستاذ بالإسلاموفوميا، الشي اللي أدى لوقوع الجريمة.
وكتقول الصحيفة أن حتى شنينة تراجع على هضرتو، اللي متابع دابا بتهمة “التواطؤ فالاغتيال الإرهابي”، بحيث صرح وقال أن الحاجة اللي ضاراها فهذشي كامل هي ان بنتو ماحضراتش لقرايتها، وكان خاصو يتحقق من أسباب استبعادها من الدرس، أما الكاريكاتير “فا مامسوقش ليهم”، على حد تعبيرو.
المحامي ديال شنينة، نبيل الوشيكلي، قال أن الموكل ديالو تراجع خطوة إلى الوراء “وكيشوف كوشمارات كل ليلة، تبين أنه تأثر بزاف بكلام بنتو اللي كذبات”، حسب تصريحو لصحيفة “لوباريزيان”.
تقرير “لوباريزيان” فالموضوع هنا:
