عفراء علوي محمدي- كود//
كشف مسؤول فوزارة الصحة ل”كود” السبب علاش أعداد الملقحين بالجرعة الأولى من فاكسان كورونا نقصو بزاف.
وقال المسؤول، اللي رفض يكشف اسمو، ان هذشي تخاذ بقرار تعطى لمراكز التلقيح، بحيت تمنعات الجرعة الأولى للناس ديال الصفوف الأمامية لي هوما الصحة والتعليم والجيش والأمن والدرك والداخلية.
وزاد المسؤول أنه حتى الناس لي فاتهم الموعد ديال الجرعة الأولى حابسين عليهم التلقيح حتى يتعاود يعطيوهم الموعد من جديد، والاسماء ديال الناس لي فالصفوف الأمامية ولي فاتهم الموعد مكايطلعوش فالتطبيق كَاع دابا.
وقال المسؤول ل”كود” أنه كاين حديث على أن السطوك مابقاش ولكن فبعض الأقاليم واخا كاين الڤاكسان حبسو الجرعة الأولى.
وفحديث سابق مع “كود”، قال مسؤول فاللجنة العلمية للتلقيح أن هذشي ماعندوش علاقة بالسطوك ديال الفاكسان، بل حيت الناس اللي ولاو يتوافدو على مراكز التلقيح بكثرة هوما اللي فايت ليهم خداو الجرعة الأولى، باش يزيدو الجرعة الثانية ويتمكنو من استخراج الباسبور الصحي بالزربة.
وتابع نفس المصدر أنه كاين تهافت كبير وغير مسبوق فمراكز التلقيح من طرف المغاربة اللي خاصهم يدكَو الجرعة الثانية ديال الفاكسان، والأطقم الصحية ولات تعطي الأولوية ليهم، حيت “باغيين ينعتقو شيئا ما من القيود الاحترازية، وكاينين منهم عدد كبير اللي باغيين يسافرو”.
