كود كازا//
كلشي تيهضر على العملية الأمنية اللي نفذاتها مصالح الأمن في فيلا بطريق أزمور، وضبطات فيها 11 واحد، كلهم من المرفحين، وحجز كوكايين وقراعي ديال الشراب، واللي تقدموا أمام الوكيل واطلق سراحهم، بعد متابعتهم بالسكر العلني واستهلاك المخدرات وإحداث الضوضاء، قبل ما يتشد المنظم ديال هاد السهرة، واللي صيفطوه لعكاشة، باش يتحاكم فحالة اعتقال.
القضية دازت اليوم فالمحكمة ديال عين السبع، و”كود” جابت خبار جديدة، تتعلق بالمتهم المعتقل، اللي فعمرو 30 عام، ولي عندو سوابق معا صحابوا، تسبب ليهم في دمار حيث دار ليهم شي قوالب عمرهم ما ينساوها.
واحد الملايري معروف، تسبب ليه فالطلاق، وشتت ليه شمل الأسرة ديالو، حيت الطريقة اللي دار ليه غريبة وممتوقعاش.
مصدر “كود” قال بلي هاد السيد اللي مشدود قديم فهادشي ديال تنظيم الجلسات ديال الطاسة والجنس والكوكايين، وشي مرة استدرج داك الملايري معا شي بنت، وملي سالات القصارة، صيفط ليه فيديو كيوثق للحظات الحميمية اللي جمعاتو معا البنت، وبدا يبتز فيه، كل مرة طرف ديال الفلوس حتى وصل 180 مليون وماحشمش، حتى تيقول ليه صافي مسحت الفيديو وتيعاود يصيفطو ليه، وتما الملايري مرض وداخ وقرر يصارح مرتو، باش يعرف أش يعمل، لكن القضية حماضت بينو وبين مرتو اللي متقبلاتش المشكل وطلبات الطلاق.
وهاد خينا هرب من ديك الساعة واختفى عن الأنظار قبل ما يبان ملي تجبدات اسميتو عند مداهمة الفيلا ديال طريق أزمور.
دابا الهضرة تقلبات وهادوك اللي تشدو في الفيلا ولاو تيقولو مزيان فلتنا، أما كن حتى هما لقاو راسهم في أشرطة وابتزازات.
