كود كازا//

عطات دراسة للبنك الدولي بعنوان “اتجاهات مشاركة المرأة فسوق الشغل بالمغرب” الاكراهات اللي كتخبط فيهم المرا المغربية، والمعيقات اللي ماكتخليهاش تشارك فسوق الشغل.

وقال الدراسة أن المغرب عندو اقل المعدلات فالعالم على مستوى المشاركة النسائية فسوق الشغل، واخا كاين ارتفاع ديال حصة الفرد من الناتج المحلي الإجمالي، وانخفاض معدل الخصوبة، وتحسين فرص التعليم.

واعتبرات ان المغرب هو أكثر البلدان فمنطقة الشرق الأوسط وشمال إفريقيا اللي فيه مشاركة نسائية فالشغل قليلة بشكل مستدام (21 فالمية)، ويقد يولي المعدل ديالو اقل من المتوسط فالمنطقة الى استمر هكذا.

وبالتسبة لعام 2018، كشفات الدراسة أن المغرب حتل المرتبة 180 من أصل 189 دولة فالمشاركة النسائية فسوق الشغل، بنسبة مشاركة ديال 21,6 فالمية فقط، وهذشي اقل من المعدل اللي حصل عليه هذي 20 عام.

ووردات أن المشاركة دالمرا فسوق الشغل منخفضة بزاف حيت 78 فالمية من العيالات بين 15 و65 عام ماخداماتش وماكيقلبوش على خدمة.

واستنتجات الدراسة أن كلما ارتفع مستوى تعليم المرأة زادت مشاركتها فالسوق، وكلما كان رب الأسر مكون كثر تهمشو النساء داخل الأسرة وضعاف نشاطهم، وخصوصا الاسر فالمجال القروي، وحتى الزواج كيقلل من المشاركة فسوق الشغل، ووجود نساء غير نشيطات فالأسرة الواحدة كيأثر على المرا ويخليها تاهي ماتنشطش.