الرئيسية > كود سبور > البلجيكي دي بروين فرش “الفيفا” اللي ظلمت أمرابط وبونو باش تحزر مودريتش
24/11/2022 14:03 كود سبور

البلجيكي دي بروين فرش “الفيفا” اللي ظلمت أمرابط وبونو باش تحزر مودريتش

البلجيكي دي بروين فرش “الفيفا” اللي ظلمت أمرابط وبونو باش تحزر مودريتش

كود سبور//

حط كيفن دي بروين الإتحاد الدولي لكرة القدم “الفيفا” فواحد الموقف محرج من بعدما تعطاتو جائزة أحسن لعاب فالماتش ديال بلجيكا ضد كندا البارح فكأس العالم قطر 2022، واعترف هو بلي ما يستحقهاش، الشي اللي جعل بزاف من جمهور الكرة والمتتبعين يستغربو من طريقة اختيار الفائز بالجائزة، خصوصا أن هاد لبلان تكرر فاكثر مرة فهاد المونديال فحال فماتش المغرب وكرواتيا.

كيفن دي بروين وملي قالو له راك ربحتي جائزة أحسن لعاب فماتش بلجيكا وكندا تصدم وقال: راني ما لعبتش ماتش مزيان، وما عرفتش علاش عطاوني جائزة أحسن لعاب، يمكن بسبب الاسم ديالي”، فإشارة منو بلي واخا مكانش مزيان ولكن الشهرة ديالو شفعت له ياخد الجائزة.

التصريح ديال كيفن دي بروين حط الإتحاد الدولي لكرة القدم فواحد الموقف صعيب، خصوصا وأن كلشي الجمهور اللي تبع الماتش ما بين  بلجيكا وكندا لاحظ بلي الكنديين دارو ماتش كبير فالوقت اللي بلجيكا كانوا ناقصين وعيانين، وجاتهم فرصة وحدة ماركاها لهم ميشي باتشواي ضد التوقعات حيث كلشي كان كيتسنا كندا تماركي.

الجمهور ديال كرة القدم فالعالم استغرب بزاف حيث هاد لبلان ديال احسن لعاب ما وقعش غير فماتش بلجيكا وكندا، ولكن وقع فماتشات اخرين فحال مباراة المغرب وكرواتيا واللي تعطات فيها جائزة رجل الماتش للكرواتي لوكا مدريتش واخا ما بانش فالتيران والمغاربة قطعو عليه الماء والضو، وخلاوه هو وصحابو شادين الكرة وغارقين فاللعب السلبي، وملي سالا الماتش وفالوقت اللي كلشي كان كيتسنا تكون جائزة أحسن لعاب فالمواجهة من نصيب لعاب مغربي حيث المغرب اللي كان مزيان تكتيكيا تعطات الكرواتي مدرتش.

الجمهور على مواقع التواصل الاجتماعي اختار سفيان أمرابط وياسين بونو، وحتى جريدة “ليكيب” الفرنسية عزلات بونو أحسن لعاب فالماتش، واللي زاد أكد بلي الفيفا ظلمت المغرب واللعابا المغاربة حيث ما عزلتش منهم احسن لعاب فالماتش ديال ليكيب ناسيونال وكرواتيا، هو تصريح البلجيكي كيفن دي بروين اللي ما ماركاش وما عطاش أسيست ديال البيت، وتختار احسن لعاب والكنديين كانوا كيطيرو فالتيران وما عزلت منهم “الفيفا: حتى واحد.

 

موضوعات أخرى

29/03/2024 14:46

شرع اليد فدولة مزال خدامة بقانون ليوطي “الرجعي”.. اعتداء على “مفطر رمضان” مقطوع رجع النقاش للتخلف القانوني فبلادنا

29/03/2024 14:30

ها المعقول..استثمار صيني كبير فالمغرب بـ3 مليار درهم لانتاج بطاريات السيارات الكهربائية غايوفر 2500 منصب شغل وبلادنا هربات على لالجيري فصناعة السيارات

29/03/2024 14:00

الدريب لـ گود: الناصيري عطى لكثير للوداد وهادي صفحة وطويناها ودابا حقبة جديدة برئاسة البرناكي وغنخدمو لإرضاء الوداديين

29/03/2024 13:45

تفاصيل حصرية على وضع منسقة جهوية لحزب سياسي بجهة فاس مكناس فالحراسة النظرية: خدات من الضحايا فلوس صحيحة وصلات 18 مليون والمدير الجهوي ديال الضرائب هو اللي فضحها

29/03/2024 13:30

الجيش الإسباني غاد يوسع المنشأت العسكرية ف سبتة ومليلية وغيجهز مراكز خاصة للتدريبات والمناورات لسلاح المدرعات

29/03/2024 13:20

تفاصيل اعتداء فرنساوي من أصول جزائية على مغربي فطنجة: مول الفعلة تقدم مع مرا فرنسية للنيابة العامة

29/03/2024 13:00

علاش الاتحاد الأوروبي كيلعب لعب خايب مع المغرب وكيشكك فالسلع الفلاحية ديالو؟