25/04/2024 13:08
وفينكم يا الاسلاميين اللي طلعتو شعارات سياسية فالشارع وحرضتو المغاربة باش تحرجو الملكية بسباب التطبيع.. هاهي حماس بدات تعترف بالهزيمة وتنازلت على مبادئها: مستعدين نحطو السلاح بشرط تقبل اسرائيل بحل الدولتين
كود – عن DW //
قدرو جوج سيدات متحولات جنسيا (ترانس) يضمنو مقاعدهم كنائبتين فالبوندستاكَ (البرلمان الألماني) من بعد الإعلان على نتائج الإنتخابات اللي دازت أول البارح، الأحد 26 سبتمبر.
تيسا كَانسيرير (Tessa Ganserer)، مولات 44 عام، من مدينة نورمبركَ في ولاية بافاريا ونيكي سلافيك (Nyke Slawik)، اللي عندها 27 عام، من ولاية شمال الراين – ويستفاليا، هوما بجوجهم من حزب الخضر، اللي جا الثالث فالانتخابات الألمانية اللخرة بنسبة 14.8 فالمية من الأصوات، واللي كيتوقعو عدد من المتتبعين أنه غايكون ليه دور مهم فتشكيل الحكومة الائتلافية الجاية.
وقالت كَانسيرير لـ”رويترز” بللي “هذا انتصار تاريخي للخضر وحتى لحركة “العبور الجنسي” وللمجتمع المثلي كلو”. وأكدات بللي نتائج هاد الإنتخابات بينات أن المجتمع الألماني ولى منفاتح ومتسامح أكثر.
وكانت كَانسيرير عضوة في البرلمان الإقليمي ديال “بافاريا” من بعد فوزها فانتخابات 2013.
من جهتها، كتبات سلافيك فالكونط ديالها فـ”إنستكَرام”، تعليقا على انتخابها كنائبة برلمانية: “مايمكنش! مازال مامتيقاش هادشي”. وطالبات بخطة عمل لمحاربة الهوموفوبيا والترانسفوبيا وأيضا بتحسين القانون الفيدرالي لمكافحة كل أشكال التمييز.
