سهام البارودي – كود//

فقت ماعليا ما بيا حتى كانلقا الفايسبوك مهزوز بفيدوات و تصاور عباد الله خارجين البارح بالليل يهللو و يكبرو فالزناقي ! جماعات من بزاف ديال البشر كاتتحدا الدولة لي فارضة حضر التجول و كاتحددا الوطن لي بزاف د الناس دايرين فيه مجهودات كبيرة للتوعية و كاتتحدا الانسانية لي كلها اليوم كاتعاني مع هاد الوباء !

هادشي ماصدمنيش شخصيا حيت انا عارفة مع من عايشة ! و عارفة انه فاش كايتجمع الكالاخ و الجهل مع الدين كاينتجو قنابل موقوتة ! كائنات مغيبة العقل ! ماكاتآمن لا بحملات توعية لا بهضرة د الدولة لا بنصائح التلفزة ! الشيء لي كايخلينا عوض مانتواجهو مع كورونا بوحدها كايخصنا نتواجهو مع كورونا و ماهوا اكفس و اقبح و اخطر من كورونا : الجهل و الكالاخ لي مسيطر على بعض الناس.

للاسف ! اليوم كانخلصو كاملين ! ضريبة سنوات من التجهيل و التكليخ ! سنوات من المقررات المدرسية لي ماكاتنميش ملكة الفكر ماكاتزرعش فالانسان داك الفضول و النقد ! لا ماكاين غا حفظ و عرض ! كانخلصو كاملين اليوم ضريبة التساهل مع القنوات الشرقية لي ساهمات فانتشار التطرف و الافكار الظلامية ! كانخلصو كاملين ضريبة ديال ديك الضبابية لي غادية بيها الدولة بين ليماج ديال الدولة الحداثية لي باغا تعطي و الحقيقية ديال الخرافة و الجهل لي مازال ضاربين فبنادم تال زداگاداگ.

داكشي لي طرا البارح راه فرصة باش نشوفو وجهنا فالمراية و الدولة تفيق براسها و بلي المواطن لي كاتربيه اليوم راه هوا لي غادي تحتاجو غدا ! و لي زرعاتو غاتحصدو! كان عندك مواطن واعي راك غاتسهل عليه و على راسك التواصل و غاتلقاه فاهم بوحدو بلا ماتحتاج القياد يبحو و يخرجو حلاقمهم و هوما كايشرحو ليه بلي خاصو يدخل لدارو ! كان عندك مواطن غارق فالجهل و الخريف راه غايمحنك نهار تحتاجو و يقدر گاع يضرب ليك كلشي فالزيرو فحالي وقع البارح.