كود الرباط عادل المكناسي ////
الازمة المغربية السعودية غادية وتكبر. البارح مع اعلان المغرب فالصحف الامريكية ماشي حتى فالاعلام المغربي انو قرر رسميا يسحب قواتو المشاركة فالتعاون العسكري اللي كتقودو السعودية في اليمن ضد الحوثيين٬ كان مسلسل اخر من مسلسلات التصعيد فالعلاقات المغربية السعودية.
مسلسل بدا منذ وصول محمد بن سلمان الى الحكم واخا هو غير ولي العهد ولي بوه سلمان مريض كيدير ما بغى. بن سلمان دار بحال بوش باش وصل للحكم: يا معايا يا مع الشر. المتهم باعطاء اوامر بقتل الصحافي جمال خاشقجي ما رضاش ان المغرب يكون عندو صوت بوحدو فالازمة الخليجية بين السعودية والامارات من جهة وقطر من جهة ثانية. المغرب خدا الحياد ودابا باغيه هاداك بن سلمان يخلص هاد الحياد.
اخر فصول هاد الازمة هو ان سفيرنا فالسعودية مصطفى المنصوري كاين فالرباط. مصدر “كود” قال باللي ما كاين لا استدعاء للسفير للتشاور ولا والو. ولكن تواجدو فالرباط فهاد الوقت كيعني ما كيعني. سفير السعودية فالرباط اللي ضسر وعيط لوزير الاوفاق وهو مازال ما عندوش الاعتماد حتى هو واحل.
العلاقات متوترة بزاف ورفض المغرب استقبال بن سلمان الوقت اللي هو يحددو لعبات فتصعيد هاد الازمة.
احسن حاجة يديرها المغرب هو يعاود طبيعة علاقتو بالسعودية. هادوك اللي غير بدات الازمة ناضو لليد اللي كتوجع المغرب ومشاو للصحرا فقناتهم العربية. هادو فيهم لغدر
